Адвакаты будуць у Вярхоўным Судзе абскарджваць прысуд, вынесены чальцам прэзідыуму Каардынацыйнай рады Марыі Калеснікавай і Максіму Знаку. Пра гэта паведамляе тэлеграм-канал Віктара Бабарыкі.
На абскарджанне даецца 10 дзён.
Пра паводзіны дачкі ў судзе распавёў бацька Марыі Калеснікавай Аляксандр:
«Сваімі паводзінамі яна падкрэслівала, што для яе, напэўна, гэта не самы важны этап і ў гэтым працэсе і наогул. Мне падаецца, што такое яе стаўленне і да жыцця, і да сваёй пазіцыі і ўсе ейныя паводзіны – яны сёння дапамаглі мне прынамсі не расчуліцца. Маша і Максім былі здзіўленыя тым, што ў зале былі лічаныя людзі, якіх яна бачыла і ведала, але тым не менш яны нейкімі жэстамі, воклічамі падтрымлівалі атмасферу прыемнай сустрэчы. Гэта нас здорава падтрымала».
Людзі, між тым, сустрэлі адвакатаў і бацькоў асуджаных апладысментамі.
Нагадаем, што Марыі Калеснікавай і Максіму Знаку прысудзілі 11 і 10 гадоў пазбаўлення волі адпаведна.
Максім Знак будзе адбываць пакаранне ў калоніі ўзмоцненага рэжыму.
Іх прызналі вінаватымі ў змове з мэтай захопу дзяржаўнай улады неканстытуцыйным шляхам (ч. 1 арт. 357 КК), стварэнні экстрэмісцкага фармавання і кіраванні ім (ч. 1 арт. 361-1 КК), а таксама ў закліках да дзеянняў, накіраваных на прычыненне шкоды нацыянальнай бяспецы (ч. 3 арт. 361 КК).
МГ belsat.eu
