У двух сельскіх выканаўчых камітэтах Ваўкавыскага раёну сфармаваныя першыя атрады народнага апалчэння, паведамляе Міністэрства абароны Беларусі.
Яны выконваюць задачы па забеспячэнні грамадскага парадку падчас комплекснай праверкі баявой гатовасці Узброеных сілаў, якая цяпер ідзе, а таксама сочаць за бяспекай руху вайсковых калонаў.
Пра тое, што Лукашэнка паставіў задачу стварыць народнае апалчэнне, напрыканцы красавіка заявіў міністр абароны Беларусі Віктар Хрэнін. Атрады ствараюцца, каб у выпадку ваенных дзеянняў «трансфармавацца ў партызанскі рух і стаць рэзервам для тэрытарыяльнай абароны».
26 лютага 2023 года старшыня Рады бяспекі Беларусі Аляксандр Вальфовіч заявіў, што ўдзельнікам народнага апалчэння выдадуць стралковую зброю. Далей у сакавіку Рада бяспекі падтрымала законапраект «Аб народным апалчэнні». Віктар Хрэнін атрымаў задачу дапрацаваць законапраект і накіраваць яго ў Савет Міністраў, а потым – у Палату прадстаўнікоў. Закон дагэтуль не прынялі.
Міністэрства абароны разлічвае, што да народнага апалчэння далучацца 100-150 тысяч чалавек, а магчыма і болей.
Марыя Міхалевіч belsat.eu
