Абраная прэзідэнтка Беларусі Святлана Ціханоўская звярнулася да беларусаў з заклікам «паклапаціцца пра сябе і родных».
«Не дазваляць сабе лішняй панікі, а выдыхнуць, прымаць рашэнні спакойна. І калі ёсць нешта, што можна зрабіць, каб засцерагчы сябе, – лепей рабіць гэта загадзя», – сказала Святлана Ціханоўская.
Паводле дэмакратычнай лідаркі, падзеі апошніх гадоў «навучылі нас рыхтавацца да горшага і заўсёды клапаціцца пра блізкіх і тых, хто пацярпеў. Мы ўбачылі, што шукаць логіку і пралічваць наступныя крокі тыранаў бессэнсоўна. Яны не кіруюцца логікаю».
«Пагаварыце з роднымі і сябрамі, абмяркуйце план дзеянняў на выпадак небяспекі. Назапасьцеся наяўнымі грашыма, лепей у валюце, а яшчэ лепей – у розных валютах. Абмяркуйце з дзецьмі правілы паводзінаў у стрэсавых сітуацыях і базавую бяспеку, можна нават правесці невялікае трэнаванне ў гульнявой форме. Даведайцеся, ці ёсць у вашым раёне памяшканні, у якіх можна схавацца ў выпадку ўдараў з паветра, вызваліце іх ад лішніх рэчаў, пакіньце там мэблю і невялікі запас кансерваў. Праверце хатнюю аптэчку, калі трэба – папоўніце яе неабходнымі сродкамі: бінты, бандажы, сродкі індывідуальнай абароны, антысептыкі, антыбіётыкі, заспакаяльныя сродкі і таблеткі для абеззаражання вады, а таксама тыя лекі, якія вам патрэбныя», – заявіла Ціханоўская.
Беларусам «як ніколі важна захаваць сябе», не дазваляць сабе застацца ў роспачы і «прымусіць адмовіцца ад страху, у які заганяе нас рэжым, а таксама думаць цвяроза». Таму, заключыла Ціханоўская, «падрыхтавацца і скласці сабе план дзеянняў на выпадак надзвычайнага здарэння ніколі не будзе лішнім».
Прычыны такога звароту патлумачыла прэс-сакратарка Святланы Ціханоўскай Ганна Красуліна. Яна адзначыла, што верагоднасць, што рэжым яшчэ больш уцягне Беларусь у вайну, «на жаль, абсалютна не нулявая».
«Апошнія гады беларусам даводзіцца самім клапаціцца пра сваю бяспеку і здароўе – і падчас ковіду, і падчас пратэстаў 2020, і з пачатку вайны ва Украіне. Гэтага не робяць тыя, хто робіць выгляд, што яны дзяржава, – і таму мы звяртаемся наўпрост да людзей», – сказала яна.
Больш за тое, «праз працу прапаганды не ўсе беларусы разумеюць, наколькі наша краіна ўжо зараз уцягнутая ў вайну, – людзі толькі адчуваюць, што іх жыццё становіцца горшым і небяспечным, але ад іх спрабуюць схаваць прычыну гэтага».
Міністр абароны Украіны Аляксей Рэзнікаў заявіў, што на беларускіх вайсковых базах цяпер 12 тысячаў расейскіх вайскоўцаў. Аднак, паводле яго, гэтай колькасці недастаткова, каб пачаць новы наступ з боку Беларусі.
Якуб Хруст belsat.eu