На фестывалі «Сэрца Еўропы» зарэзервавалі месцы для зняволеных журналістаў

Месцы для беларускіх журналістаў і журналістак, які цяпер за кратамі былі зарэзерваваныя на фестывалі, арганізаваным Польскім тэлебачаннем у Варшаве. Таблічкі з імёнамі Кацярыны Андрэевай, Дарʼі Чульцовай, Ірыны Слаўнікавай і Анджэя Пачобута стаялі на знак павагі да калегаў, якія адбываюць пакаранне ў Беларусі за прафесійную дзейнасць.

Арганізаваны Польскім тэлебачаннем Міжнародны фестываль «Heart of Europe» – першы фестываль тэлевізійных праектаў, які цалкам прысвечаны краінам Цэнтральнай і Усходняй Еўропы. Ён накіраваны на папулярызацыю тэлевізійнай творчасці ў рэгіёне, а таксама на развіццё грамадскіх медыяў і ўмацаванне іх ролі ў медыяландшафце ўсёй Еўропы.

Падчас фестывалю «TV Heart of Europe» у аўдыторыі былі зарэзерваваныя месцы для затрыманых беларускіх журналістаў. Варшава, Польшча. 5 лістапада 2021 года. Фота: ЮШ / Белсат

– Мэта фестывалю – умацаванне супольнасці жыхароў гэтай часткі Еўропы, стымуляванне абмену ідэямі, абмен кантэнтам, – кажуць яго стваральнікі.

Сёння на фестывальнай імпрэзе чатыры месцы ў залі былі пустыя. Яны былі сімвалічна зарэзерваваныя для беларускіх журналістаў – Кацярыны Андрэевай, Дарʼі Чульцовай, Ірыны Слаўнікавай і Анджэя Пачобута, які таксама зʼяўляецца сябрам Саюзу палякаў у Беларусі.

Фота: ЮШ / Белсат

– Беларусаў не хапае за нашым сталом. Мы павінны быць разам і памятаць пра нашых братоў і сясцёр. Гэтыя крэслы зарэзерваваны для Дарʼі Чульцовай, Кацярыны Андрэевай, Ірыны Слаўнікавай і Анджэя Пачобута. Іх павінна быць яшчэ больш… – патлумачыў гэты сімвалічны жэст віцэ-прэзідэнт праўлення TVP Матэвуш Матышковіч. – Дарагія беларусы, мы чакаем, калі вы далучыцеся да нас і сядзеце за наш стол.

Кацярына Андрэева і Дар’я Чульцова атрымалі прэмію «Free Media Awards 2021»

АА belsat.eu

Падпісвайся на telegram Белсату

Hавiны