Беларускі жаўнер у форме спрабаваў разрэзаць агароджу пасля перасячэння польскай мяжы каля Дубічаў-Царкоўных. Пра гэта выданню Interia.pl паведаміла прэс-сакратарка Памежнай аховы Анна Міхальска.
Паводле яе, убачыўшы польскія патрулі, беларускі сілавік хутка рушыў углыб тэрыторыі Беларусі. Агароджа пашкоджаная нязначна і не патрабуе рамонту.
Агароджа знаходзіцца на польскім баку, таму беларускі жаўнер, як мяркуецца, свядома перасек мяжу.
Анна Міхальска адзначыла, што гэта не першая такая сітуацыя.
«Людзі, якія разбураюць агароджу, часта бываюць у вайсковай форме, але часта яны апранутыя і ў цывільнае адзенне – часта ў балаклавах. Мы бачым, што яны не замежнікі. Яны паводзяць сябе інакш, не жадаюць перасякаць мяжу, шкодзяць шлагбаум і сыходзяць», – распавяла яна.
Ранкам 28 жніўня ў Варшаве сустрэліся міністры ўнутраных справаў Польшчы, Літвы, Латвіі ды Эстоніі. На сустрэчы абмеркавалі сітуацыю на фоне вайны ва Украіне, пагрозаў з боку Расеі і Беларусі, у тым ліку баевікоў Групы Вагнэра.
Пасля сустрэчы міністры расказалі, што гатовыя закрыць межы з Беларуссю і Расеяй «супольна і салідарна», а нагодамі да поўнага закрыцця межаў могуць стацца «крытычныя інцыдэнты»: як узброеная правакацыя са стралянінаю, гэтак і нелегальны пераход мяжы вялікаю групаю мігрантаў. Апошніх, дарэчы, ужо пачалі затрымліваць у Беларусі.
Якуб Хруст belsat.eu