Паводле Генеральнага штабу ЗСУ, расейская армія фарсіравала Северскі Данец на краматорскім кірунку. Нагадаем, Северскі Данец – найбуйнейшая рака на Данбасе.
У Генштабе канстатуюць, што расейскія вайскоўцы цяпер замацоўваюцца ў зонах населеных пунктаў Лісічанск і Белагораўка. Страту Лісічанску ўкраінскае камандаванне прызнала ўчора, 3 ліпеня.
На лісічанскім напрамку расейцы абстрэльваюць з артылерыі пазіцыі ўкраінскіх войскаў у зонах населеных пунктаў Залатароўка і Верхнякаменка. Залатароўка таксама захопленая.
Гэтую інфармацыю пацвердзіў і кіраўнік Луганскай абласной вайсковай адміністрацыі Сяргей Гайдай.
Тым часам, на славянскім кірунку ўкраінскія вайскоўцы адбілі атакі ў напрамку Пасіка – Далына на поўдзень ад Ізюму.
Нагадаем, пасля цяжкіх баёў за Лісічанск украінскія вайскоўцы мусілі адступіць з занятых пазіцыяў і рубяжоў. Украінскае камандаванне патлумачыла, што далейшая абарона гораду магла прывесці да «фатальных наступстваў» – атачэння групоўкі ЗСУ.
3 ліпеня прэзідэнт Украіны Уладзімір Зяленскі прызнаў пагрозу поўнай акупацыі Луганскай вобласці.
Глеб Нержын belsat.eu
