4 траўня ў Берасці агучылі прысуды чарговым 11 фігурантам так званай «карагоднай справы». Іх прызналі вінаватымі і прысудзілі розныя тэрміны «хіміі» і «хатняй хіміі», піша «Берасцейская Вясна».
Рашэнне аб пакаранні прымала суддзя Людміла Рубашэўская. Паводле агучаных прысудаў:
- Дзмітрый Шамшура і Юрый Клімавец атрымалі па 3 гады «хатняй хіміі».
- Палітзняволеныя Ігар Ляшкевіч і Дыяна Вашчыліна – 3 гады «хатняй хіміі».
- Кацярына Ерамеева, Ірына Кузьмянчук, Юлія Леванюк, Ларыса Яхімовіч, Дзмітрый Неўмяржыцкі – 2 гады «хатняй хіміі».
- Віталь Брыцько і Людміла Карабанюк – па 3 гады абмежавання волі з накіраваннем ва ўстановы адкрытага тыпу («хімія»).
Усіх абвінавачаных прызналі вінаватымі паводле ч.1 арт.342 КК («Актыўныя дзеянні, якія груба парушаюць грамадскі парадак»).
Палітвязні Ігар Ляшкевіч і Дыяна Вашчыліна, якія са снежня 2021 году ўтрымліваліся ў СІЗА Берасця, пасля абвяшчэння прысуду былі вызваленыя з-пад варты.
З улікам гэтых прысудаў у межах «карагоднай» справы асуджаныя ўжо 127 чалавек.
Так званая “карагодная справа” была заведзеная на ўдзельнікаў акцыі пратэсту, якая адбылася ў Берасці 13 верасня 2020 году. У той дзень, людзей якія вадзілі пад музыку карагод, разагналі вадамётамі. Атмасферу той акцыі пратэсту фігуранты “карагоднай справы” на судах апісвалі як святочную.
ЗК belsat.eu
