Кіраўнік КДБ Іван Церцель заявіў, што ў Польшчы рыхтуюць тэракты ў Беларусі, і прыгразіў суседняй краіне «жорсткім адказам» за пераход «чырвоных лініяў». Ён сказаў таксама, што Менск давёў сваю пазіцыю да Варшавы, перадае дзяржаўнае агенцтва БелТА.
Старшыня Камітэту дзяржбяспекі прыгразіў «жорстка адказаць» Польшчы на парушэнне «чырвоных лініяў». Іван Церцель заявіў, што ў суседняй краіне ёсць лагеры для падрыхтоўкі баевікоў, дзе плануюцца тэракты:
«У нас ёсць кантакты са спецслужбамі Польшчы. Мы ім па ўсіх каналах даводзім інфармацыю, занепакоенасць, будзем глядзець на рэакцыю. У тым ліку пра лагеры на іх тэрыторыі, спробы ўчынення і запланаваныя тэракты. Я не хацеў бы ўжываць паняцце «чырвонай лініі», але гэта ў міжнароднай практыцы недапушчальныя выпадкі. Таму трэба разумець, што захады ў адказ будуць не менш, а можа, і больш дзейснымі з нашага боку, калі будуць дапушчаныя такія сітуацыі».
Церцель таксама звярнуўся да неназваных ворагаў.
«Мы ведаем кожнага. Мы ведаем, умоўна кажучы, што яны ядуць на сняданак і з кім кладуцца спаць. Надыдзе час – усе адкажуць», – упэўнены кіраўнік КДБ.
Сёння раней ён заявіў пра затрыманне грамадзянаў Польшчы і краінаў Балтыі за нейкую «агентурную дзейнасць». Калі іх схапілі, колькі ўсяго падазраваных і ў чым менавіта іх абвінавачваюць, Церцель не ўдакладніў.
Таксама, паводле яго, у Беларусі затрыманыя «дзясяткі грамадзянаў Украіны» за спробы здзяйснення тэрактаў, выведна-падрыўную і шпіёнскую дзейнасць.
Сяргей Крот belsat.eu