Кантрабанду хавалі сярод дыняў і морквы.
Літоўская мытня паведаміла 3 жніўня, што мытнікі затрымалі ў мінулы чацвер яшчэ адну буйную партыю кантрабандных цыгарэтаў, якія везлі з Беларусі.
Раніцай 29 ліпеня грузавік «Volvo» прыбыў на пункт пропуску «Лаворышкес» (з беларускага боку па дарозе – «Котлаўка»). Кіроўца, грамадзянін Расеі, заявіў, што вязе транзітам праз Літву 1500 скрыняў морквы і дыняў.
Аднак пры рэнтгенаўскім аглядзе машыны выявілі нешта дзіўнае. Аказалася, за морквай і дынямі былі 1200 скрыняў беларускіх цыгарэтаў. Партыю ацанілі на € 1,9 млн. Кіроўцу арыштавалі на месяц, вядуць расследаванне.
У той жа дзень яшчэ 40 скрыняў з 20 тысячамі пачак беларускіх цыгарэтаў выявілі ў вагоне з друзам, які прыбыў з Беларусі ў чыгуначны пост «Кена». Гэтую партыю ацанілі ўсяго на € 64 тыс.
За дзень да затрымання гэтых партыяў, 28 ліпеня, літоўскія мытнікі паведамілі пра затрыманне кантрабанднай партыі беларускіх цыгарэтаў на € 3,6 млн. А 29 ліпеня ўжо палякі расказалі пра затрыманне партыі беларускіх цыгарэтаў на $ 2,3 млн, пры тым скрыні на фота палякаў і літоўцаў былі надзіва падобныя.
За першае паўгоддзе 2021 года ў Літве агулам затрымалі кантрабандных цыгарэтаў на € 31,8 млн, і тры чвэрці з таго – беларускія цыгарэты.
У траўні польскія мытнікі затрымалі рэкордную партыю беларускіх кантрабандных цыгарэтаў – яе ацанілі аж на $ 9,7 млн.
АА belsat.eu
