Будоўлю на месцы былога аўтавакзалу «Маскоўскі» хочуць аднавіць – там маюць з'явіцца бізнес-апартаменты
На месцы былога аўтавакзалу «Маскоўскі» ў Менску, на скрыжаванні вуліцы Філімонава і праспекту Незалежнасці, зноў распачнецца будоўля. Гэта вынікае з указу Лукашэнкі № 162 ад 1 чэрвеня аб унясенні змяненняў ва ўказ 2013 года аб будаўніцтве «Газпром-Цэнтру». Дакумент быў апублікаваны 3 чэрвеня на Нацыянальным прававым інтэрнэт-партале Рэспублікі Беларусь.
Указ вызваляе ААТ «Газпром трансгаз Беларусь» ад аплаты пені за невыкананне тэрміну рэалізацыі інвестыцыйнага праекту. Таксама кампанія вызваляецца ад арэнднай платы за зямельны ўчастак, на якім будзе стаяць комплекс, з 1 ліпеня 2023 года да 31 снежня 2028 года.
Тэрмін рэалізацыі праекту працягваецца да 2027 года.
Цяпер у «Газпром-Цэнтры» плануецца будаваць бізнес-апартаменты ці шматфункцыянальныя памяшканні, пры іх будаўніцтве можна кіравацца нормамі і правіламі для памяшканняў адміністрацыйнага прызначэння ды для жылых памяшканняў.
Уласнікі, арандатары бізнес-апартаментаў і чальцы іхных сем’яў, блізкія сваякі змогуць рэгістравацца ў гэтых памяшканнях.
У той жа час, згодна з інвестыцыйнай дамовай аб будаўніцтве комплексу, інвестар мае права на змяненне функцыянальнага складу шматфункцыянальнага комплексу, ягоных асобных частак, у тым ліку да сканчэння будаўніцтва. Змены павінны ўзгадняцца з Менгарвыканкамам і не мусяць прыводзіць да змяншэння аб’ёму інвестыцыяў.
Аўтавакзал «Маскоўскі» знеслі ў 2015 годзе, нягледзячы на крытыку гэтай ідэі ў грамадстве і медыях. Планавалася, што на яго месцы пабудуюць самы высокі ў Менску хмарачос вышынёй 189 метраў. Будаўніцтва ацэньвалася амаль на мільярд долараў і павінна было скончыцца да 2018 года.
Аднак у снежні 2016 года будаўніцтва замарозілі і аднавілі ў 2018-м, калі з’явіўся новы генпадраднік – італьянская кампанія «Codest International». У 2021 годзе працы зноў спыніліся.
Марыя Міхалевіч belsat.eu
