238-ы дзень пратэстаў. Ціханоўская звярнулася да міжнароднай супольнасці, Пушкіна пакінулі ў вязніцы
Акцыі пратэсту ў Беларусі працягваюцца 238 дзён. Грамадзяне краіны патрабуюць адстаўкі Лукашэнкі, спыніць гвалт і пакараць вінаватых за масавыя фальсіфікацыі і катаванні. «Белсат» падводзіць вынікі гэтага дня.
Ціханоўская звярнулася да міжнародных лідараў за падтрымкай КР
«Сёння я і 55 чальцоў асноўнага складу Каардынацыйнай рады накіравала ліст у міжнародныя арганізацыі і структуры, у тым ліку – ААН, АБСЕ, Еўрапарламент, Дзярждэпартамент ЗША і Раду Еўропы, з заклікам выступіць у падтрымку КР», – паведамляецца ў тэлеграм-канале Святланы Ціханоўскай.
«З моманту стварэння члены КР падвяргаліся ціску і рэпрэсій, многія яго лідары – у турме або вымушана знаходзяцца не ў Беларусі, а значыць не могуць галасаваць пры прыняцці рашэнняў. А ў апошнія тыдні рэжым пачаў уводзіць новыя «законы», якімі спрабуе апраўдаць масавыя рэпрэсіі.
Гэта не мае нічога агульнага з працай, якую мы вядзем. Усё, чаго мы хочам, – гэта мірнае рашэнне палітычнага крызісу ў Беларусі. Менавіта за гэта беларусы галасавалі на прэзідэнцкіх выбарах 9 жніўня».
Офіс Святланы Ціханоўскай запускае праект «Прожектор регионов»
Адымсловы праект офісу Святланы Ціханоўскай – гэта чат-бот @bel2020_bot куды кожны можа напісаць і распавесці, што адбываецца ў ягоным горадзе. Мэтаю праекту з’яўляецца паказ таго, што сапраўды адбываецца не ў Менску. Дзе звальняюць людзей, дзе квітнее карупцыя ды дзе прадпрыемствы парушаюць закон.
Паведамляюць, што ўсю атрыманую інфармацыю будуць верыфікаваць і распавядаць, каб як мага больш беларусаў даведалася пра праблемы іншых і што іх можна вырашыць.
Мастака Пушкіна не выпусцяць з вязніцы да суду
Праз 72 гадзіны пасля затрымання мастака Алеся Пушкіна не выпусцілі з гарадзенскай турмы. Стала вядома, што яго не выпусцяць з-пад варты да суда.
Алеся Пушкіна вінавацяць паводле ч.3 арт. 130 КК («Распальванне нацыянальнай, расавай ды іншай варажнечы групай асобаў»). Нагодай стаў партрэт антысавецкага партызана Яўгена Жыхара. Мастаку пагражае ад 5 да 12 год пазбаўлення волі.
Пушкін жыве ў мястэчку Бобр Крупскага раёну Менскай вобласці. Да яго прыйшлі з вобшукам 26 сакавіка ў дзве гадзіны ночы супрацоўнікі Следчага камітэту і пяцёра амапаўцаў. У майстэрні сапсавалі карціны, разбілі шкло. Канфіскавалі тэлефоны і тэхніку ўсіх членаў сям’і, у тым ліку непаўналетніх дзяцей.
«Голас» абвяргае ўзлом сваёй базы
Платформу «Голас» абвяргае «зліў» сваёй базы з нумарамі тэлефонаў. У тэлеграм-канале платформы назвалі такія звесткі хлуснёй.
«У базе дадзеных платформы «Голас» ня захоўваюцца нумары тэлефонаў карыстальнікаў. Усе дадзеныя захоўваюцца ў хэшаваным выглядзе (гэта значыць, зашыфраваныя), з якога немагчыма даведацца нумар тэлефона. Доступу да нумароў карыстальнікаў няма нават у распрацоўнікаў», – заявілі ў «Голасе».
Распаўсюд звестак пра «зліў» прадстаўнікі платформы звязалі з «з эфектыўнасцю працы «Галасы» – платформа карыстаецца даверам і беларусаў, і ўсёй міжнароднай супольнасці, якая пасля абвяшчэння галасавання за перамовы па выхадзе з крызісу прыкметна актывізавалася».
Змены ў заканадаўстве
Начальнік Аператыўна-аналітычнага цэнтру пры Аляксандру Лукашэнку Андрэй Паўлючэнка і старшыня Пастаяннай камісіі Палаты прадстаўнікоў па аграрнай палітыцы Мікалай Шаўчук 2 красавіка прадставілі законапраект аб змяненні закона «Аб электрасувязі». Дакумент прапануе надзяліць ААЦ у пэўных выпадках правам прымаць рашэнні аб прыпыненні або абмежаванні функцыянавання сетак электрасувязі і сродкаў электрасувязі, паведамляе сайт Палаты прадстаўнікоў.
Невыкананне аператарамі электрасувязі патрабаванняў ААЦ будзе лічыцца грубым парушэннем заканадаўства аб ліцэнзаванні ў галіне сувязі.
СК belsat.eu
