Памежная служба Літвы паведамляе, што за чацвер і ранак пятніцы затрымалі 150 нелегальных мігрантаў – гэта амаль удвая больш, чым за ўвесь 2020 год.
Сярод затрыманых – грамадзяне Іраку, Ірану, Камеруну, Сірыі і Афганістану.
Сёлета Літва фіксуе выбуховы рост незаконнай міграцыі з Беларусі. Агулам з пачатку года ў Літву нелегальна спрабавалі трапіць 822 чалавекі. Для параўнання: у 2017 годзе літоўцы злавілі на мяжы 72 нелегальных мігранты, у 2018-м – 104, у 2019-м – 46, у 2020-м – 81.
Улады Літвы абвінавачваюць афіцыйны Менск у тым, што ён спрыяе нелегальнай міграцыі ў Еўразвяз. Кіраўніцтва Літвы называе дзеянні рэжыму Лукашэнкі «гібрыднай вайною». Міністр замежных справаў Літвы Габрыелюс Ландсбергіс раней заявіў у інтэрвʼю Financial Times, што да арганізацыі каналу незаконнай міграцыі мае дачыненне дзяржаўная турфірма «Цэнтркурорт» (яна ўваходзіць у структуру Кіраўніцтва справамі Лукашэнкі). Паводле міністра, улады Беларусі мэтанакіравана перакідаюць мігрантаў да мяжы. За магчымасць апынуцца ў краіне ЕЗ выхадцы з Блізкага Усходу плацяць да $ 15 тысяч.
На найвышэйшым узроўні рэжым Лукашэнкі дэ-факта прызнае, што разглядае міграцыйнае пытанне ў якасці механізму шантажу Еўразвязу і помсты за санкцыі. 26 траўня, праз тры дні пасля скандалу з прымусовай пасадкаю самалёта «Ryanair», Лукашэнка заявіў, што заходнія краіны цяпер будуць вымушаныя самастойна змагацца з наркатрафікам і незаконнай міграцыяй.
ІІ belsat.eu