Сёння, 2 траўня, праваслаўныя вернікі Беларусі адзначаюць свята Вялікадня, а ў краіне 267 дзень працягваецца супрацьстаяння ўладаў і грамадства, якое патрабуе спыненне гвалту, палітычнага пераследу, фальсіфікацыяў і адстаўкі Лукашэнкі.
Праваслаўныя вернікі адзначаюць Вялікдзень.
Гэта самае вялікае свята хрысціянаў, якое азначае перамогу жыцця над смерцю. Святочныя набажэнствы прайшлі ва ўсіх храмах краіны.
Вялікдзень хрысціяне называюць таксама святам Уваскрашэння Хрыста. Як сведчыць Біблія, у гэты дзень, пасля распяцця на крыжы за грахі ўсяго чалавецтва, Ісус Хрыстос уваскрэс з мёртвых.
З Вялікаднем усіх праваслаўных беларусаў павіншавалі Святлана Ціханоўская і Павел Латушка
Святлана Ціханоўская запісала відэазварот, у якім павіншавала праваслаўных беларусаў са святам. Таксама Ціханоўская адзначыла, што Вялікдзень заўсёды быў вельмі важным святам, якое адзначалі ўсёй сям’ёй, аднак у гэтым годзе гэта немагчыма:
«Нас, як і многія беларускія семʼі, падзяліла злачынная ўлада. Але менавіта ў гэты момант многія з нас убачылі, што мы не адны. Блізкія і далёкія, знаёмыя і незнаёмыя беларусы прыйшлі на дапамогу адзін аднаму. І мы па-сапраўднаму адчулі, што наш народ – адна вялікая сямʼя. І я ўпэўненая, што гэтую салідарнасць мы пранясем праз усе выпрабаванні і захаваем яе пасля нашай агульнай перамогі.
У сваім віншаванні Павел Латушка ўзгадаў, як святкавалі Вялікдзень у яго дзяцінстве і наколькі гэта было важнае свята, як яго чакалі: «Усе рыхтаваліся да свята дабра, святла, перамогі жыцця над смерцю».
«Сёння нас раскідала па свеце, сёння мы перажываем гэту барацьбу за дабро, але мы верым, што Хрыстос дапаможа нам у гэтым нашым змаганні за праўду, за святло», – кажа Павел.
Святлана Ціханоўская сустрэлася з італьянскімі палітыкамі і лідарамі прафсаюзаў
Падчас двухдзённага візіту ў Італію Ціханоўская сустрэлася з міністрамі замежных справаў, працы і еўрапейскіх справаў ураду Італіі, спікерам Палаты дэпутатаў, мэрам Рыму, кіраўнікамі палітычных партыяў, праваабаронцамі, прадстаўнікамі італьянскіх і міжнародных прафсаюзаў.
«Італія гатова падтрымаць захады па ўзмацненні ціску на рэжым з мэтай спыніць рэпрэсіі і распачаць перамовы, у тым ліку праз ужыванне «разумных санкцыяў», якія дапамогуць аказаць максімальны кропкавы ціск на рэжым і яго асобаў», – паведамляе прэс-служба Ціханоўскай.
У Маскве сарвалі прэм’еру спектакля пра пратэсты ў Беларусі
У незалежным маскоўскім Театре.doc вечарам 1 траўня была сарваная прэм’ера спектакля рэжысёра Сяргея Гіндыліса «Суседзі», прысвечанага беларускім пратэстам у жніўні 2020 года.
Прыкладна праз паўгадзіны пасля пачатку прадстаўлення ў залу ўвайшлі працаўнікі паліцыі, перапыніўшы актораў. Яны паведамілі гледачам, што паступіў сігнал аб закладзенай у памяшканні бомбе. Усе былі вымушаныя пакінуць залу.
Акторы працягнулі спектакль на вуліцы. Паліцыя папярэдзіла іх і гледачоў, што яны могуць быць затрыманыя.
З СІЗА КДБ прыйшоў першы ліст ад Аляксандра Фядуты
Ліст ад Аляксандра Фядуты прыйшоў яго жонцы Марыне Шыбко.
«Ліст пра каханне, гэта першы ліст, які я атрымала за ўвесь гэты час, хоць адправіла яму ўжо тры. Усё разумее, усё зразумеў, куды трапіў, якая пастка. Зразумеў, як трапіў у пастку. Астатняе – асабістае, шле прывітанні», – кажа Марына.
На канверце, які прыйшоў спадарыні Марыне, штамп ад 28 красавіка. У ім Аляксандр піша: «Сёння на шпацыры паўгадзіны глядзеў на неба. Сіняе-сіняе і белыя аблокі, прыгожа. Сёння 26 красавіка».
У лісце, які займае амаль дзве старонкі сшытка, ніводнага слова не закрэслена цэнзурай.
Спадарыня Марына ўжо двойчы перадавала перадачы мужу, сярод іншага лекі і танометр:
«У мяне ўсё прынялі. Я перадавала ўсё, што можна, бо я кажу, што я ўжо вопытны лагерны работнік, ведаю, як там і што. Піша, што з боку медыцынскай часткі стаўленне да яго добрае, жартуе, што ціск яму мераюць часцей, чым ён мераў сам. Канечне, у яго былі праблемы з ціскам», – кажа Марына Шыбко.
У квітанцыі за камунальныя паслугі з’явіцца новы радок расходаў
У «жыроўках» за камунальныя паслугі хутка з’явіцца новая радок па аплаце выдаткаў за кіраванне агульнай маёмасцю сумеснага домаўладання.
У Менскай гарадской жыллёвай гаспадарцы растлумачылі, што ўдзельнікі сумеснага домаўладання – гэта, па сутнасці, усе ўласнікі і наймальнікі, якія пражываюць у шматкватэрных дамах. А да агульнага маёмасці адносяцца памяшкання, канструктыўныя элементы і абсталяванне, размешчаныя за межамі кватэры – у пад’ездзе, склепе, на гарышчы і дваровай тэрыторыі.
Памер платы за паслугу будзе залежаць ад плошчы кватэры. Дапушчальны тарыф складзе 0,0165 рубля за 1 м².
Алесь Дзянісаў выпусціў альбом на вершы Уладзіміра Караткевіча
Музыка Алесь Дзянісаў з гурта Dzieciuki прэзентаваў сольны альбом «Леаніды вяртаюцца…» на вершы Уладзіміра Караткевіча.
Назва альбома «Леаніды вяртаюцца…» – гэта адсылка да рамана Уладзіміра Караткевіча «Леаніды не вернуцца да Зямлі» («Нельга забыць»). Леаніды – метэорны паток, ці «зорны дождж», які можна назіраць у лістападзе.
Вокладку альбома зрабіла дачка музыкі Дар’я.
АД, belsat.eu
