У Берасці ў дзяржаўным універсітэце імя А. Пушкіна 30 лістапада затрымалі каля 15 асобаў, паведаміла крыніца «Белсату».
Затрыманні праводзіў КДБ, імаверна, за падтрыманне Украіны. У інтэрнаце ўніверсітэту прайшлі ператрусы.
Аблаву пазней пацвердзіў праўладны тэлеграм-канал і ўдакладніў, што затрыманыя 15 студэнтаў за распаўсюд «нацысцкіх, фашысцкіх, экстрэмісцкіх матэрыялаў ды парнаграфіі».
Апошнім часам масавыя затрыманні ды ператрусы – даволі частая з’ява ў Беларусі. Хваля ператрусаў прайшла ў аўторак 28 лістапада – сілавікі перавярнулі кватэры людзей, якія звязаныя з Каардынацыйнай радай і ўжо даўно не жывуць у Беларусі, таксама прыйшлі да бацькоў некаторых з актывістаў.
10 лістапада хапун прайшоў у Баранавічах – былі затрыманыя 10 асобаў, сярод якіх – праваабаронца Аляксандр Вайцешык.
Раней паведамлялася пра масавыя затрыманні на шэрагу беларускіх прадпрыемстваў.
Марыя Міхалевіч belsat.eu