Менска-Магілёўская мітрапалітальная курыя прыняла шэраг захадаў, каб захаваць дзейнасць парафіяльнай супольнасці ва ўмовах часовага закрыцця Чырвонага касцёлу. У межах гэтых захадаў замест Уладзіслава Завальнюка адміністратарам касцёлу прызначылі Юрыя Санько.
Касцёл святога Сымона і святой Алены ў Менску надалей зачынены для наведвання. 30 лістапада Менска-Магілёўская мітрапалітальная курыя агучыла шэраг захадаў дзеля таго, каб парафія працягнула існаваць.
У межах захадаў курыя прызначыла новага адміністратара, якім замест Уладзіслава Завальнюка стаў ксёндз-канонік Юрый Санько. Святар цяпер будзе адказваць за адміністрацыйныя справы парафіі і рамонт Чырвонага касцёлу, у тым ліку і будзе весці перамовы з уладамі.
Дзейнасць парафіі Чырвонага касцёлу будзе адбывацца ў бажніцы Найсвяцейшай Панны Мары ў Менску (архікатэдра, пл. Свабоды 9).
26 верасня ў Чырвоным касцёле здарыўся пажар, пасля чаго ўлады замкнулі бажніцу і не пускалі туды нават святароў. Паводле афіцыйнай версіі Міністэрства надзвычайных сітуацыяў, уночы ў МНС паступіла паведамленне пра тое, што ў касцёле Святых Сымона і Алены спрацавала пажарная сігналізацыя. «Высветлілася, што адбылося загаранне электраправодкі ў будынку. У выніку здарэння пашкоджаная маёмасць на плошчы каля 20 кв. м. Ніхто не пацярпеў», – заявілі ў ведамстве.
Неўзабаве камісія надзвычайных сітуацыяў пры адміністрацыі Маскоўскага раёну Менску пастанавіла «часова забараніць эксплуатацыю будынку». У касцёл няма доступу, не пускаюць нікога.
Парафія Чырвонага касцёлу – адна са старэйшых і найбуйнейшых у Менску. Штодня ў святыні адбывалася ад 6 да 8 службаў, тут працавала нядзельная школа, ладзілася шмат розных культурніцкіх ініцыятываў. Дзе цяпер будуць маліцца вернікі, незразумела. Не выключаецца, што закрыццё святыні можа быць палітычна матываваным.
Алена Аляксандрава belsat.eu
