Лукашэнка «прывязаў» лекараў: па ардынатуры 5 гадоў адпрацоўвання або вялізныя выплаты
Закон, апублікаваны 1 лістапада, уносіць змены ў мноства ранейшых законаў адносна медыцыны, але найбольш закранае тых, хто пойдзе ў ардынатуру пасля 1 лютага 2024 года.
Аляксандр Лукашэнка 25 кастрычніка падпісаў закон «Аб зменах законаў у пытаннях аховы здароўя». 1 лістапада гэты закон быў афіцыйна апублікаваны і часткова набыў моц. Але змены адносна ардынатуры датычаць тых, хто пачне падрыхтоўку пасля 1 лютага 2024 года. Змены наступныя.
• Ардынатура, якую раней мусілі праходзіць далёка не ўсе лекары, цяпер стане абавязковай для допуску да надання спецыялізаванай і высокатэхналагічнай дапамогі.
• Платнай ардынатуры ўжо не будзе – прайсці яе можна будзе толькі за кошт бюджэту, а значыць, абавязкова будзе трэба адпрацаваць па размеркаванні.
• Тэрмін размеркавання па ардынатуры павялічваецца з 2 да 5 гадоў (нават для завочнікаў) і дадаецца да часу навучання ў ардынатуры. Час жа навучання можа складаць ужо не 2 гады вочна і 3 завочна, а ад 2 да 5 гадоў.
• За адлічэнне ці самастойны сыход з ардынатуры трэба будзе кампенсаваць выдаткі на навучанне.
• За адмову працаваць па размеркаванні трэба будзе кампенсаваць выдаткі на навучанне, памножыўшы іх на каафіцыент 2,5.
Акрамя таго, закон уводзіць новы тып медычных установаў – рэабілітацыйны цэнтр для залежных ад наркотыкаў і алкаголю; падрабязней рэгулюе ўніверсітэцкія клінікі, пашырае выдачу лекаў за кошт бюджэту ды іншае.
Алесь Наваборскі belsat.eu
