У Беларусі мінае 448-ы дзень палітычнага крызісу. Прэзідэнцкія выбары 9 жніўня мінулага году выліліся ў супрацьстаянне паміж грамадствам і рэжымам Лукашэнкі. Як мінуў гэты дзень – у аглядзе «Белсату».
У судзе Першамайскага раёну Менску адбылося судовае паседжанне ў справе афіцыйнай прадстаўніцай «Белсату» ў Беларусі Ірыны Слаўнікавай. Яе затрымалі ўначы 30 кастрычніка па прылёце ў менскі аэрапорт разам з мужам Аляксандрам Лойкам.
Ірыну абвінавацілі паводле ч. 2 арт. 19.11 КаАП і інкрымінавалі распаўсюд праз Facebook матэрыялаў, якія былі прызнаныя экстрэмісцкімі. Гэтыя матэрыялы нібыта размяшчаліся там у перыяд са студзеня 2020 года да траўня 2021-га. Суддзя прысудзіў ёй 15 содняў арышту. Такі ж прысуд агучыў суд і ў дачыненні да Аляксандра Лойкі.
Журналісткі «Белсату» Кацярына Андрэева і Дар’я Чульцова, якія цяпер за кратамі, атрымалі прэстыжную журналісцкую прэмію «Free Media Awards 2021».
Беларускае аб’яднанне рабочых (БАР), якое абвесціла агульнанацыянальны страйк з 1 лістапада, паведамляе, што дзясяткі тысяч беларусаў не выйшлі сёння на працу.
«На 15 гадзіну пацвердзілі нявыхад на працу толькі ў наш бот крыху болей чым 20000 чалавек. Пакуль яшчэ апрацоўваем дадзеныя», – распавёў «Белсату» Сяргей Дылеўскі, лідар БАР.
Група хакераў «Кіберпартызаны» распавяла, што ім удалося ўзламаць унутраную паштовую сістэму МУС РБ. У якасці доказу хакеры апублікавалі некаторыя дакументы з гэтай базы і распавялі, што далей чытаюць пошту, тлумачальныя запіскі і зводкі не толькі МУС, але і ГУУС, УУС і гэтак далей.
Акрамя гэтага хакеры распавялі і пра тое, што ў іх есць доступ да базы дадзеных Фонду сацыяльнай абароны насельніцтва.
Улады Беларусі распачалі рыхтаванне да рэферэндуму ў справе ўнясення зменаў у Канстытуцыю. Лідзія Ярмошына, старшыня ЦВК, распавяла, што магчыма, галасаванне можа адбыцца ў лютым 2022 году, піша «Спутник».
ЦВК Беларусі распачала рыхтаванне да рэферэндуму, на якім будзе вынесена пытанне аб унясенні зменаў у Канстытуцыю.
Дыпламаты Еўразвязу дамовіліся пашырыць крытэрыі санкцый супраць рэжыму Лукашэнкі, улічваючы сітуацыю з «незаконным перасячэннем» знешніх межаў дзяржаў-членаў ЕЗ і «кантрабанду незаконных тавараў або небяспечных тавараў на тэрыторыю дзяржавы-сябра».
Пяты пакет санкцый павінен з’явіцца ў сярэдзіне лістапада, паведамляе брусельскі журналіст Рыкард Юзвяк.
СК belsat.eu