Літва не будзе супрацоўнічаць з Генпракуратурай Беларусі ў межах справы «аб генацыдзе»

Генеральная пракуратура Літвы адмовілася даваць прававую дапамогу ў крымінальнай справе «аб генацыдзе насельніцтва Беларусі». Пра гэта паведамляе прэс-служба Генпракуратуры Беларусі.

Паводле інфармацыі беларускага боку, Генпракуратура Літвы апавясціла, што не будзе даваць прававой дапамогі, бо гэта «можа нанесці шкоду іх суверэнітэту або бяспецы, правам і законным інтарэсам грамадзянаў».

Генпракуратура Беларусі ў сваім прэс-рэлізе заяўляе, што Літва нібыта такім чынам «фактычна спрыяе ўкрывальніцтву нацысцкіх злачынцаў ад правасуддзя».

Нагадаем: у траўні генеральны пракурор Андрэй Швед заявіў, што беларускі бок мае намер шукаць нацысцкіх злачынцаў у Польшчы і Літве. «Мы ўстанавілі звесткі пра яшчэ жывых нацысцкіх злачынцаў, якія лічыліся ў спісах і бралі ўдзел у дзейнасці карных батальёнаў. У першую чаргу літоўскіх батальёнаў СС і Арміі Краёвай [насамрэч Армія Краёва ваявала супраць гітлераўскай Нямеччыны. – Заўв. belsat.eu]. Цяпер рыхтуюцца адпаведныя матэрыялы і будзе накіраванае даручэнне пра наданне прававой дапамогі ў гэтыя дзяржавы, каб адпаведныя праваахоўныя органы правялі з гэтымі асобамі (а яны яшчэ жывыя, нам вядома іхнае месца жыхарства) працэсуальныя дзеянні ў межах крымінальнай справы аб генацыдзе», – распавёў ён.

У МЗС Літвы назвалі заяву Андрэя Шведа спробай адцягнуць увагу ад парушэнняў правоў чалавека ў Беларусі. «Нікчэмная спроба сказіць і палітызаваць балючыя пытанні гісторыі, як і заява пра спробу арганізаваць перавароты і да таго падобнае, хочуць адцягнуць увагу ад парушэнняў правоў чалавека ў гэтыя дні ў Беларусі, пазбегнуць адказнасці за пагаршэнне двухбаковых літоўска-беларускіх стасункаў, апраўдаць уласныя рашэнні ва ўнутранай палітыцы ў таталітарным духу», – падкрэслілі ў літоўскім МЗС у траўні.

• У красавіку Генпракуратура Беларусі распачала крымінальную справу па факце генацыду насельніцтва Беларусі ў гады Вялікай Айчыннай вайны і ў пасляваенны перыяд. Справу аб падзеях 80-гадовай даўніны распачалі ў прапагандысцкіх мэтах: улады хочуць такім чынам апраўдаць цяперашні тэрор супраць іншадумцаў і жорсткую канфрантацыю з Захадам.

ІІ belsat.eu