Менскі абласны суд 1 жніўня ў выязным пасяджэнні працягвае разбіраць «справу аб змове з мэтай захопу дзяржаўнай улады». Як паведамляе «Вясна», палітзняволены кіраўнік Партыі БНФ Рыгор Кастусёў на судовым працэсе не прызнаў віны ні ў адным з пунктаў абвінавачання.
Як піша праваабарончы цэнтр «Вясна», спасылаючыся на праўладныя СМІ, Рыгор Кастусёў патлумачыў у судзе, што ўдзельнічаў у онлайн-канферэнцыях «змоўнікаў» як слухач. Адказваючы на пытанне пракурора, Кастусёў заявіў, што «не чуў, каб абмяркоўвалі пытанне аб захопе ўлады» ў Беларусі.
Кажучы пра выстаўленыя абвінавачанні, дзе гаворыцца, што змоўнікі планавалі прыцягнуць на свой бок войска ды іншыя сілавыя структуры, Кастусёў сказаў, што ўспрыняў такую інфармацыю як абразу сілавікоў. Паводле падсуднага, ён «не верыць, што сярод беларускага генералітэту ёсць тыя, хто можа здрадзіць радзіме». Рыгор Кастусёў таксама заявіў, што ніколі не заклікаў да фізічнай ліквідацыі Лукашэнкі.
45-гадовая сяброўка Партыі БНФ Вольга Галубовіч прызнала віну ў поўным аб’ёме. Але ёй інкрымінуюць толькі актыўны ўдзел у групавых дзеяннях, якія груба парушаюць грамадскі парадак (ч. 1 арт. 342 КК).
Яшчэ адзін падсудны, дальнабойнік Дзяніс Краўчук, таксама прызнаў віну ў поўным абʼёме. Яму, як і Галубовіч, інкрымінуюць толькі злачынства паводле ч. 1 арт. 342 КК.
Суд у так званай «справе змоўнікаў» пачаўся 29 ліпеня. На лаве падсудных – палітзняволеныя палітолаг і літаратуразнаўца Аляксандр Фядута, кіраўнік Партыі БНФ Рыгор Кастусёў, сябра БНФ Вольга Галубовіч, актывіст і дальнабойнік Дзяніс Краўчук, а таксама юрыст Юрый Зянковіч. Справу разглядае суддзя Уладзімір Арэшка. Паводле БелТА, Аляксандр Фядута прызнаў віну часткова.
Пяцярых абвінавачаных затрымалі ў сярэдзіне красавіка 2021 года. Праваабаронцы прызналі палітвязнямі ўсіх, акрамя Юрыя Зянковіча. Фігурантаў справы трымаюць за кратамі больш за 15 месяцаў. «Белсат» працягвае сачыць за працэсам.
Зміцер Міраш belsat.eu