Прэзідэнтка Малдовы Мая Санду заявіла, што ўлады краіны не адмовяцца ад Прыднястроўя на шляху да еўрапейскай інтэграцыі. Гэтую тэму яна закранула па завяршэнні саміту Еўрапейскай палітычнай супольнасці, які 1 чэрвеня прымалі ўлады Малдовы, паведамляе Noi.md.
«Мы не адмаўляемся ад прыднястроўскага рэгіёну, мы працуем у абодвух вымярэннях. Чым больш мы будзем прасоўвацца па шляху еўраінтэграцыі, тым больш бяспекі будзе на правым беразе Днястра, тым больш будзе падтрымка грамадзянаў на левым беразе Днястра за ўз’яднанне краіны», – заявіла Мая Санду.
Такім чынам яна працягнула тэму, узнятую Вярхоўным прадстаўніком Еўразвязу ў замежных справах і палітыцы бяспекі Жузэпам Бурэлем. Той адзначыў, што шлях Малдовы да еўрапейскай інтэграцыі не залежыць ад таго, што адбываецца ў прыднястроўскім рэгіёне.
Прэзідэнт Украіны Уладзімір Зяленскі 1 чэрвеня ў сваім выступе на саміце Еўрапейскай палітычнай супольнасці ў Малдове адзначыў важнасць еўраатлантычнага выбару для Беларусі.
Уладзімір Зяленскі падкрэсліў, што «кожная еўрапейская краіна, што мяжуе з Расеяй і не хоча, каб Расея разарвала яе на часткі, мусіць быць паўнапраўным чальцом ЕЗ і NATO».
«Ёсць толькі дзве альтэрнатывы гэтаму: або адкрытая вайна, або паўзучая расейская акупацыя. Мы бачым, што адбываецца ў Беларусі. Мы бачым, што адбываецца ў Грузіі. Мы бачым, як гэтыя краіны ўцягваюцца, хоць і рознымі шляхамі, у адзін і той жа стан беззаконня», – заявіў прэзідэнт Украіны.
Зяленскі адзначыў важнасць таго, каб на саміце NATO ў Вільні ўлетку Кіеў атрымаў «дакладнае запрашэнне да сяброўства і гарантыі бяспекі на шляху да сяброўства ў NATO».
Якуб Хруст belsat.eu