Аб'ектыў 02.02.2018 Як стаць Каліноўскім і перамагчы?


З нагоды дня народзінаў Кастуся Каліноўскага і 155-й гадавіны паўстання 1863 года ў Горадні адбылася прэзентацыя абноўленай гульні «Паўстанцы».

Прэзентаваў абноўленых «Паўстанцаў», а фактычна ладзіў гульню ў гарадзенскім Цэнтры гарадскога жыцця яе стваральнік Антось Янкоўскі, і хоць у першым туры перамаглі царскія службоўцы – у другім паўстанцы ўзялі рэванш ды вельмі хутка выкрылі душыцеляў паўстання.

Гульня «Паўстанцы» зʼявілася роўна пяць гадоў таму

За аснову стваральнікі ўзялі механіку вядомай «Мафіі». Гэта была першая гульня, якую стварыла творчае згуртаванне «А4».

«Паўстанцы» – першая беларуская настольная гульня, падчас якой гульцы могуць паглыбіцца ў атмасферу 1863 года і стацца знакамітаю гістарычнай асобай ці звычайным беларусам, але тым не менш уплываць на падзеі паўстання. Стваральнікі пастанавілі перавыдаць гульню, бо разышоўся папярэдні наклад і зʼявіліся новыя ідэі.

Цягам пяці гадоў згуртаванне падрыхтавала больш за дзясятак забаваў з нацыянальным каларытам для дарослых і маленькіх аматараў настольных гульняў. Шырокі наклад абноўленых «Паўстанцаў» плануецца напрыканцы сакавіка.

Ірына Дарафейчук, «Белсат», фота: symbal.by

Глядзі таксама
Каментары