Чарговыя сем содняў арышту мінулі. Сёння на свабоду выйшаў адзін з лідараў Беларускага нацыянальнага кангрэсу паэт Уладзімір Някляеў, адбыўшы пакаранне за ўдзел у «Акцыі папярэджання» 8-га верасня. 71-гадовага палітыка затрымалі 15-га верасня, па дарозе ў клініку, і прызначылі яму арышт у судзе Савецкага раёну сталіцы.
Стаўленне да сябе ў Цэнтры ізаляцыі правапарушальнікаў Уладзімір Някляеў назваў псіхалагічным катаваннем: паэту не дазволілі карыстацца алоўкам не толькі каб пісаць вершы, але і каб напісаць скаргу на ўмовы ўтрымання.
«Я напішу, усё гэта апішу ў скарзе, бо з майго гледзішча проста недапушчальна адкрыта здзекавацца не толькі нада мной, а над маёй прафесіяй, над культурай, чалавечымі адносінамі», – зазначыў палітык.
Адзін з іх адбыўся падчас 5-дзённага арышту за ўдзел у Маршы абураных беларусаў, другі – напрыканцы сакавіка, калі палітыка знялі з цягніка ў Берасці ды адправілі ў ізалятар часовага ўтрымання напярэдадні Дня Волі.
«На маё перакананне, апошнімі арыштамі, ды і арыштамі пачынаючы ад 2010-га года, чакаюць што выцягнуць мяне сюды ўперад нагамі ў белых тапках», – заявіў Някляеў.
Удзельнікі акцыі 8-га верасня выказалі пратэст супраць уцягвання Беларусі ў канфлікт Расеі з NATO праз супольныя вайсковыя вучэнні «Захад-2017». Арганізаваў інфармацыйную кампанію Беларускі нацыянальны кангрэс. Арганізатары лічаць, што між іншага дзякуючы гэтай кампаніі расейскія войскі не засталіся пасля вучэнняў у Беларусі. На 21-га кастрычніка запланаваная наступная акцыя – «Марш абураных беларусаў 2.0» – супраць гэтак званага дэкрэту пра дармаедаў.
Пасля паседжання рады Беларускага нацыянальнага кангрэсу, дзе пацвердзілі рашэнне правесці марш, міліцыянты затрымалі Міколу Статкевіча. Палітык мае яшчэ неадбытыя 15 содняў пакарання за акцыю 3-га ліпеня, і чакае суда за 8-га верасня.
«Для мяне скарыцца з тым што тут адбываецца – гэта пагадзіцца з тым што я раб. Я з гэтым ніколі не пагаджуся», – сказаў Статкевіч раніцай, яшчэ да затрымання.
На свабодзе палітык прабыў тры тыдні.
Ірына Дарафейчук, «Белсат»