Смерць 21-гадовага Аляксандра Коржыча, якога знайшлі павешаным у вайсковай частцы пад Барысавам, ужо некалькі дзён запар абмяркоўвае ўся краіна. Дэпутаты і палітыкі патрабуюць неадкладна расследаваць прычыны смерці салдата, а актывісты БХД збіраюцца ладзіць пікеты, каб прыцягнуць увагу да праблемы «дзедаўшчыны» ў айчынным войску.
У той жа час петыцыя гомельскіх праваабаронцаў з патрабаваннем адстаўкі міністра абароны Андрэя Раўкова на сайце zvarot.by ужо сабрала каля 10-ці тысяч подпісаў.
«Літаральна сёння міністру абароны трэба падаць у адстаўку. Бо ён альбо не ведаў, што адбываецца ў беларускім войску, то бок некампетэнтны. Альбо ведаў і пакрываў гэта – значыць, мусіць быць прыцягнуты да крымінальнае адказнасці», – мяркуе палітык Віталь Рымашэўскі.
На сітуацыю ж вакол гібелі Аляксандра Коржыча прэс-служба кіраўніка краіны адрэагавала толькі на дзясяты дзень пасля трагічнага здарэння ў Пячах.
«Аляксандру Лукашэнку літаральна некалькі разоў на дзень дакладаецца аб хадзе аператыўных мерапрыемстваў. Паверце, пазіцыя прэзідэнта ў гэтым пытанні настолькі жорсткая, што ніхто з вінаватых ад адказнасці не сыдзе», – запэўніла Наталля Эйсмант.
Давядзенне да самагубства праз здзекі, збіццё і вымагальніцтва, забойства праз асабістую непрыязнасць і самагубства ў выніку псіхалагічнай траўмы. Крымінальная справа паводле фактаў дзедаўшчыны заведзеная супраць двух сяржантаў, якіх змясцілі на гаўптвахту.
«Акрамя гэтага, следства даводзіць, што з боку камандзіраў аддзялення ёсць факты злоўжывання ўладаю, якія выяўляліся ў выглядзе прыняцця грашовых сродкаў ад вайскоўцаў тэрміновай службы на нявызначаны час, а таксама тэлефоннымі апаратамі сотавай сувязі», – звярнуў увагу афіцыйны прадстаўнік Следчага камітэту Беларусі Сяргей Кабакевіч.
Ён, паводле следства, карыстаўся банкаўскай карткай Аляксандра Коржыча. Сёння Артур Вірбал паведаміў журналістам, што ён на волі, пра самагубства нічога не ведае, а ў дзень, калі Коржыча знайшлі мёртвым, быў у адпачынку.
«Яны яго як Ісуса Хрыста распялі, білі, трымалі ў зачыненай камеры, без святла, без вады, без тэлефонаў, без якой-небудзь сувязі і гадзінніка… Яны мусяць панесці заслужанае пакаранне», – даводзіць Святлана Коржыч, маці забітага жаўнера.
Гэтак, напярэдадні Следчы камітэт спыніў падобную справу паводле факту гібелі 25-гадовага менчука Арцёма Басцюка, якога ў сакавіку знайшлі павешаным у вайсковай частцы пад Барысавым.
Віталь Бабін, «Белсат»