Брусель. Еўрапарламент. Тут сёння адбылася дыскусія аб перабыванні баевікоў групы Вагнэра ў Беларусі ды пагрозах краінам Еўразвязу, якія зыходзяць ад іх. Дэбаты ініцыяваў літоўскі еўрадэпутат Пятрас Аўштравічус і ягоная калега з Польшчы Анна Фатыга.
Глядзіце сюжэт у нашым відэа:
«Інфармацыйная вайна – кампаньён такога тыпу дзеянняў. Група Вагнэра выкарыстоўвала яе ў Афрыцы, а таксама ў іншых справах. Яна ідзе разам з прапагандай Расеі ды яе дэзінфармацыяй. І гэта выразна бачна пасля смерці заснавальніка ПВК Вагнэра Яўгенія Прыгожына», – кажа Анна Фатыга.
Паводле прадстаўніка Усходняй групоўкі войскаў ЗСУ Іллі Еўлаша, былыя вайскоўцы групы Вагнэра падпісваюць кантракты з Міністэрствам абароны Расеі ды прыбываюць на вайну ва Украіну. У баявых дзеяннях найміты ўдзельнічаюць на розных пасадах. У тым ліку на інструктарскіх. Некаторыя ідуць у звычайныя баявыя падраздзяленні. Частка ж баевікоў адправіліся ваяваць у Афрыку. Гэта пацвярджае і арганізацыя «BYPOL».
«Калі на пачатку баевікоў тых самых каля 4000, а можа там і трохі болей, то цяпер мы бачым іх 200-300 і то па ўсей краіне. Таму ўсе астатнія, хто быў, яны з’ехалі з тэрыторыі Беларусі», – кажа кіраўнік «BYPOL» Аляксандр Азараў.
Паводле Пятраса Аўштравічуса нават такая колькасць вагнэраўцаў перш за ўсё нясе пагрозу Беларусі:
«Лукашэнка яшчэ раз прадэманстраваў, што ён гатовы на любыя правакацыі. На любыя хады не гледзячы на цану, якую павінна плаціць гэтая краіна перад светам. Адгадаць, што ён зробіць заўтра, у прынцыпе немагчыма. Можна толькі сказаць, што вось восенню будзе бульба і ён пойдзе яе капаць. Дык вось гэта мы ведаем. А што ён зробіць з гэтай бульбай, застаецца высветліць».
Пры гэтым загінулы кіраўнік вагнэраўцаў Яўгеній Прыгожын працягвае лічыцца дырэктарам беларускай кампаніі «Канкорд менеджмент і кансалтынг», зарэгістраванай у Асіповіцкім раёне, дзе размясціўся лагер баевікоў. А цэнтр нацыянальнага супраціву Украіны заявіў, што рэжым Лукашэнкі вярбуе баевікоў групы Вагнэра для сваёй уласнай кампаніі «ГардСэрвіс». Тым, хто падпіша кантракты з гэтай арганізацыяй, абяцаюць даць кватэры без чаргі.
«”ГардСэрвіс” – гэта арганізацыя, якую ствараў Шэйман. Па розных ацэнках прыкладна ў 2019 годзе. І відавочна, што Лукашэнка вырашаў гэтай арганізацыяй свае асабістыя сямейныя задачы для забеспячэння аховы сваёй маёмасці за мяжой. І гэта вось, напэўна, тая задача, якая стаіць перад гэтай арганізацыяй», – кажа палітолаг Дзмітрый Балкунец.
Паводле ж маніторынгавай групы тэлеграм-каналу «Беларускі Гаюн», у вёсцы Цэль пад Асіповічамі дэмантавалі шэсцьдзесят пяць адсоткаў намётавага лагеру вагнэраўцаў. З 292 намётаў на дзень 25 верасня засталося толькі 103. Павольна, але дэмантаж адбываецца.
Руслан Ігнатовіч, «Белсат»
