«Надвор’е ў рэспубліцы будзе вызначаць няўстойлівая прахалодная паветраная маса, што паступае з Заходняй Еўропы», – паведамляе «Белгідрамет». Небяспечных метэаралагічных зʼяваў у Беларусі заўтра не чакаецца, прагназуюцца дажджы, месцамі навальніцы. У Заходнюю ж Еўропу з поўдня ідзе хваля спякоты.
Глядзіце сюжэт у нашым відэа:
Цяперашні тэмпературны рэкорд у Еўропе зафіксавалі ўсяго два гады таму. На Сіцыліі было 48 градусаў цяпла. Сёлета гэты паказнік можа быць перавышаны праз зʼяву ў Сахары, якую метэаролагі назвалі цеплавым выбухам.
«Штогод мы назіраем перанос цёплага паветра ў паўднёвую частку Еўропы. Бывае дзве, тры, нават чатыры хвалі гарачыні цягам лета. Пераважна яны прыходзяць з Паўночнай Афрыкі, дзе змены клімату адыгрываюць і будуць надалей адыгрываць вялікую ролю ў колькасці гэтых хваляў, што мы адчуваем», – кажа метэаролаг з Грэцыі Яніс Каліянас.
Незвычайна гарачае надворʼе захоўваецца ў Грэцыі, Італіі, Іспаніі ды Партугаліі. Улады папярэджваюць грамадзянаў пра магчымыя пажары і збоі ў транспартавай ды энергетычнай інфраструктурах праз змены ў надворʼі.
«Вядома, мы занепакоеныя. Асабліва тут, у Мадрыдзе, дзе тэмпература вышэй за 40 градусаў. Ад гэтага найбольш пакутуюць асобы сталага веку».
«Куды дзявацца ад такой спякоты? Наступствы страшныя для нашай скуры, для нашага здароўя ў цэлым і для ўсяго астатняга», – кажуць жыхары Мадрыду.
Паводле прагнозаў, хваля цяпла будзе распаўсюджвацца ўсё далей на поўнач і ўсход, дасягнуўшы ў выніку Бельгіі, Нідэрландаў, Нямеччыны і Вялікай Брытаніі. Экстрэмальная гарачыня захоўваецца ў Паўночнай Амерыцы, у Кітаі ды Японіі. Надзвычайна высокія тэмпературы могуць захавацца і пад канец года. Паспрыяе гэтаму Эль Ніннё – натуральнае пацяпленне Атлантычнага акіяну, што адбываецца кожныя некалькі гадоў.
«Мы насамрэч толькі ў пачатку гэтага працэсу, таму Эль Ніннё яшчэ не так моцна паўплываў, як мы таго чакаем у другой палове года. Мы назіраем высокія тэмпературы ў паўночнай Атлантыцы, не зважаючы на тое, што зʼява Эль Ніннё яшчэ не пачалася», – кажа кіраўнік Сусветнай праграмы даследавання клімату Майкл Спэраў.
Узровень марскога лёду ў Антарктыцы сёлета рэкордна нізкі, а тэмпература вады ў акіяне беспрэцэдэнтна высокая. Мора ля Флорыды прагрэлася больш як на 32 градусы, адзначаюць адмыслоўцы.
«Каля 40 адсоткаў марской вады на планеце цяпер надзвычайна цёплая. Гэта вельмі сурʼёзна для жывых арганізмаў, што жывуць у акіяне. Да прыкладу, вакол Флорыды каралавыя рыфы вельмі ўразлівыя да такой спякоты. Калі вада застанецца гарачаю, каралы загінуць. І не толькі каралы, але і тыя віды, што ад іх залежаць, а гэта каля чвэрці марскіх відаў», – тлумачыць дырэктарка Кліматычнай камунікацыі Сьюзан Джой Гэсал.
На фоне экстрэмальнага надворʼя Злучаныя Штаты і Кітай аднавілі перамовы пра клімат. На гэтыя дзве краіны прыпадае каля 40 адсоткаў выкідаў ува ўсім свеце.
«Кітай і Злучаныя Штаты – дзве самыя магутныя эканомікі ў свеце. Мы таксама дзве найбуйнейшыя крыніцы парніковых газаў. Таму настойліва неабходна, каб дзве нашыя краіны абʼядналіся, працавалі і дэманстравалі астатняму свету, як мы можам супрацоўнічаць і тэрмінова развязваць гэтую праблему», – заявіў падчас сустрэчы ў Кітаі адмысловы пасланнік прэзідэнта ЗША наконт клімату Джон Керы.
Змены клімату, у тым ліку з антрапагенных прычынаў, відаць не толькі ў павелічэнні перыядаў моцнай спякоты, кажуць навукоўцы. Паказваюць на іх і іншыя экстрэмальныя ўмовы надворʼя: моцныя залевы, ураганы і тарнада, што робяцца ўсё больш частымі. Гэтак, непагадзь абрынулася на Паўднёвую Карэю, Індыю ды Кітай.
Ірына Дарафейчук, «Белсат»
