Алена Леўчанка на свабодзе! Хочацца крычаць і крычаць ад радасці! Я не знаёмы асабіста. Але разам з усімі свабоднымі і разважлівымі беларусамі я адсочваў ейную гісторыю. Спадарыня Алена за кароткі час стала сімвалам мужнасці і непахіснасці. Сімвалам катавання і несправядлівасці. За кароткі час яна ператварылася з ахвяры ў сапраўдную Гераіню Беларусі. Зрэшты, як і большасць нашых Беларускіх Жанчын.
Час ад часу мне падаецца, што каля Аляксандра Рыгоравіча сядзяць сапраўдныя шкоднікі. Ну, сапраўды! Сам спадар Лукашэнка, – не падарунак, і як кажуць: сам сабе цар-гаспадар, але… Навошта тады гэтая Адміністрацыя Прэзідэнта, усе гэтыя дарадцы, памочнікі, намеснікі памочнікаў, памочнікі намеснікаў? Навошта ўся гэтая армія чынавенства, якая сядзіць на гарбу ў народа? Сам Бог загадаў ім быць каля цела Самога і даваць добрыя парады, неяк вырульваць з небяспечных і нязручных момантаў.
Не ад аднога свайго знаёмага чуў наступнае: хто перашкаджаў намаляваць на выбарах спадару Лукашэшка, напрыклад, 62 % галасоў замест крыклівых 85 %? Былі б пратэсты, былі б незадаволеныя, але, хутчэй за ўсё, большасць праглынула б гэтую «элегантную» перамогу. Можна было б нават другі тур арганізаваць. Было б яшчэ больш пераканаўча! Захад бы слінаю абліўся ад такога разгулу дэмакратыі! Усё роўна зразумела, хто б выйграў у другім туры. Але не. Не знайшлося сярод усёй арміі чыноўнікаў хаця бы аднаго, які мог бы падказаць бяспечны і ўтульны шлях.
Увесь гэты жах, які зараз адбываецца на вуліцах, напэўна, таксама змова шкоднікаў. Каму стала лягчэй ад усяго гэтага «запечанага пірага» з пакалечаных, асуджаных, забітых? Уладзе? Сумняюся. І, канешне, вішанкаю на торце – Алена Леўчанка! Вы хацелі зрабіць з яе «ахвярную авечку»? Маўляў, глядзіце ўсе: нават найлепшую цэнтравую Чэмпіянату Свету па баскетболе-2010 можна засадзіць на содні! Калі яе можна, то вы, чарвякі, будзеце проста храбусцець пад ботамі! Каму стала лягчэй ад гэтага?
У якіх хворых мазгах узнікла ідэя пасадзіць сусветна вядомую спартоўку за краты? І яшчэ трымаць у нечалавечых умовах. Не выводзілі ў душ, забралі матрац і бялізну, «завялі» вошы… Людзі! Дваццаць першае стагоддзе! ад навінаў пра вошы валасы на галаве ўстаюць дыбцом! І гэта ўсё пайшло ў свет! Як можна так ненавідзець сваю краіну, каб уся гэтая інфармацыя цяпер патрапіла ў сусветныя навіны?! Імідж Беларусі цяпер нікому не цікавы?
Самае горкае і сумнае з усяго гэтага – гэта тое, што тысячы людзей, нікому невядомых, ні зорак спорту ці шоу-бізнесу, магчыма сядзяць за кратамі ў жудасных сярэднявечных умовах. Ніхто, акрамя родных і блізкіх не ведае іх імёнаў. Ніхто не піша пра іх артыкулы на сайтах. Ніхто не посціць пра іх у Telegram-каналах. Пераважная большасць з іх – не забойцы і гвалтаўнікі. Яны дакладна заслугоўваюць нечалавечых умоваў і такога стаўлення?
Алена Леўчанка – усё ж сапраўдная Гераіня! Яна вытрымала, і запісала ў свой актыў чарговыя балы. Жанчына з вялікай літары! Як і большасць нашых фантастычных Беларускіх Жанчын, на якіх трывае і трымаецца гэтая Беларусь! Прапаноўваю з сённяшняга дня пісаць Беларуская Жанчына з вялікіх літараў!
Рэдакцыя можа не падзяляць меркавання аўтара.