Сям’я з Гомлю ў адчайнай сітуацыі – не можа знайсці працу 8 месяцаў

video

Гісторыя пра жыццё на мяжы выжывання. Не дапамагаюць ані біржа, ані звароты да кіраўніка Беларусі. Гомельская сям’я не можа знайсці сродкаў для існавання, каб проста купіць харчы. Як знайсці надзею і не ўпасці ў адчай – адказу ў сацыяльнаарыентаванай дзяржаве не дае ніхто.

Больш за 8 месяцаў без працы. Сямʼя Драбышэўскіх з Гомлю – маці Людміла і ейны сын Алег – трапілі ў адчайную сітуацыю.

ЛЮДМІЛА ДРАБЫШЭЎСКАЯ, ГАМЯЛЬЧАНКА:
«Мы шукаем працу не для забеспячэнне нейкіх лішкаў, а хаця б на харчаванне».

Алег доўгі час рабіў на складзе, але на пачатку года прадпрыемства збанкрутавала, і маладзён застаўся без працы. Сямʼя харчуецца з таго, што вырасла на ўласным гародзе, часам дапамагаюць грамадскія актывісты. Пасля шматлікіх і няўдалых спробаў знайсці працу самастойна звярнуліся па дапамогу ў Цэнтр занятасці.

АЛЕГ ДРАБЫШЭЎСКІ, ЖЫХАР ГОМЛЮ:
«Я фізічна здаровы чалавек, працавіты, сумленны, не пʼю і не палю, дысцыплінаваны, вельмі хачу знайсці працу».

Але паўсюль адмовы. Паводле назіранняў Драбышэўскіх, шмат якія прапановы Цэнтру занятасці існуюць толькі фармальна – месцы аказваюцца занятыя. Амаль страціўшы надзею, сямʼя звярнулася ў апошнюю інстанцыю.

ЛЮДМІЛА ДРАБЫШЭЎСКАЯ, ГАМЯЛЬЧАНКА:
«Мы шукалі магчымасці ўжо за межамі магчымага. Таму што афіцыйна дзяржава нам ніякіх захадаў абароны не прапанавала. І я была змушаная звярнуцца ў Адміністрацыю прэзідэнта, ужо дасягнуўшы апошняй ступені адчаю».

Толькі плёну гэта не прынесла: зварот вярнулі ў Гомель, і Драбышэўскія дасюль застаюцца без адказу. Паводле прадстаўніка незалежнага прафесійнага звязу, гэткія трагічныя лёсы – заканамерны вынік дзяржаўнага падыходу ў сферы сацыяльнай палітыкі.

АНДРЭЙ ТОЛЧЫН, НЕЗАЛЕЖНЫ ПРАФСАЮЗ РЭП:
«20 год няма рэформаў. 20 год няма нейкай уцямнай сацыяльнай палітыкі. Таму пакуль у нас не будзе нармальнага рэфармавання сапраўднага, тады ў нас і будзе расці беспрацоўе».

Хоць на паперы пытанне працаўладкавання ў нашай краіне ўвогуле не стаіць – афіцыйнае беспрацоўе складае ўсяго 1 %. Ды і фінансавую дапамогу тым, хто ўсё ж такі стаў на улік на біржы працы, – складана назваць дапамогаю: яна роўная ўсяго Br 180-ці тысячам у месяц. Гэтак грамадзяне ўсцяж застаюцца з гэтаю праблемай сам-насам.

ТР, «Белсат»

Глядзі таксама
Каментары