Кіраўнік Украіны Пятро Парашэнка прысвоіў народнай дэпутатцы Надзеі Саўчанцы званне Героя Украіны.
Украінскі лідар падпісаў адпаведны ўказ. «Надзея з’яўляецца сімвалам нязломнасці ўкраінскага духу і гераізму, сімвалам таго, як трэба абараняць і любіць Украіну, сімвалам нашай перамогі», – заявіў украінскі прэзідэнт, падае unian.net.
Пятро Парашэнка адзначыў мужнасць і стойкасць украінкі, якая была ўзятая ў палон, злачынным чынам перавезеная ў Расею, дзе доўгі час адчувае псіхалагічны ціск і вымушана галадаць у знак пратэсту. Кіраўнік Украіны таксама адзначыў, што Надзея Саўчанка з’яўляецца сімвалам таго, як шмат залежыць ад аднаго чалавека. «Мы зробім усё магчымае для таго, каб вызваліць вас з палону. Я вельмі спадзяюся, што буду мець магчымасць уручыць вам Залатую Зорку Героя Украіны», – сказаў Парашэнка.
33-гадовая ўкраінская вайскоўка, дэпутат Вярхоўнай Рады і чалец парламенцкай дэлегацыі ў Парламенцкай асамблеі Рады Еўропы Надзея Саўчанка з ліпеня 2014 года знаходзіцца ў турме ў Расеі. У знак пратэсту Надзея Саўчанка галадае ўжо 80 дзён.
Незалежныя нямецкія медыкі вызначылі, што пасля 6-8 сакавіка лётчыца ніколі не зможа вярнуцца да нармальнага паўнавартаснага жыцця – яна застанецца або інвалідам, або гэта прывядзе да смяротнага зыходу.
МЯ, belsat.eu, паводле unian.net
