Парашэнка: Усе краіны ЕЗ ратыфікавалі пагадненне аб асацыяцыі з Украінай


Брусельскі парламент ратыфікаваў пагадненне аб асацыяцыі ЕЗ-Украіна. Цяпер пагадненне ратыфікаванае ўсімі краінамі Еўразвязу.

«Брусельскі парламент ратыфікаваў Пагадненне аб Асацыяцыі з Украінай. Цяпер асацыяцыю з намі ратыфікавалі ўсе дзяржавы. Слава Украіне!» – напісаў у Twitter прэзідэнт Украіны Пятро Парашэнка.

Бельгія – адзіная краіна ЕЗ, дзе міжнародныя пагадненні маюць ратыфікаваць таксама мясцовыя парламенты. «Сталічны рэгіён Брусель» заставаўся адзіным, які не ратыфікаваў асацыяцыю, піша Espreso.tv.

Такім чынам парламент Каралеўства Бельгіі ратыфікаваў пагадненне.

У той жа час на старонцы Еўракамісіі адзначаецца, што на дадзены момант цалкам выканалі ўсе неабходныя працэдуры па завяршэнні ратыфікацыі пагадненні і перадачы Генеральнаму сакратарыяту Рады ЕЗ ратыфікацыйных граматаў 23 краіны-сябра Еўразвязу. Пра гэта піша УНІАН.

Ратыфікацыйныя граматы пакуль не паступалі ад Бельгіі, Кіпру, Грэцыі, Італіі і Нідэрландаў.

Падпісанне пагаднення аб асацыяцыі паміж ЕЗ і Украінай абмяркоўвалася на саміце Усходняга Партнёрства два гады таму ў Вільні. Але тагачасны прэзідэнт Украіны Віктар Януковіч адмовіўся падпісваць дакумент.

НМ, belsat.eu

Глядзі таксама
Каментары