Еўракамісія збіраецца выкарыстаць замарожаныя 320 мільярдаў еўраў Расеі для дапамогі Украіне
Старшыня Еўрапейскай камісіі Урзуля фон дэр Ляен абвясціла пра палітычныя і фінансавыя планы Еўрапейскага Звязу адносна падтрымання Украіне ў ейным супрацьстаянні расейскай агрэсіі.
«Расейскае ўварванне ва Украіну прынесла смерць, разбурэнні і невымоўныя пакуты. Мы ўсе памятаем жахі Бучы. Расея павінна заплаціць за свае жудасныя злачынствы, уключаючы злачынства агрэсіі супраць суверэннай дзяржавы», – сказала кіраўніца Еўракамісіі.
Яна прапанавала стварыць у дадатак да Міжнароднага крымінальнага суда адмысловы суд, падтрыманы Арганізацыяй Аб’яднаных Нацыяў, «каб расследаваць і караць расейскае злачынства агрэсіі».
«Мы гатовыя пачаць працу з міжнароднай супольнасцю, каб зрабіць магчымым найшырэйшае міжнароднае падтрыманне гэтага адмысловага суда», – заявіла фон дэр Ляен.
Таксама, паводле яе, Расея мусіць заплаціць фінансава за разбурэнні. У прыватнасці, Украіна ацаніла шкоду на 600 мільярдаў еўраў.
«Расея і ейныя алігархі мусяць кампенсаваць Украіне страты і пакрыць выдаткі на адбудову краіны. І ў нас ёсць сродкі, каб змусіць Расею заплаціць. Мы заблакавалі 300 мільярдаў еўраў з рэзерваў расейскага Цэнтрабанку і замарозілі 19 мільярдаў еўраў расейскіх алігархаў. Неўзабаве разам з нашымі партнёрамі мы можам стварыць структуру, каб распараджацца гэтымі сродкамі і інвеставаць іх. Затым мы будзем выкарыстоўваць даходы для Украіны. І калі санкцыі будуць знятыя, гэтыя сродкі будуць выкарыстаныя для таго, каб Расея цалкам кампенсавала шкоду, нанесеную Украіне», – сказала палітык.
Яна падкрэсліла, што Еўразвяз разам з партнёрамі распрацуе адпаведнае міжнароднае пагадненне і знойдзе «законныя сродкі, каб зрабіць гэта».
«Жудасныя злачынствы Расеі не застануцца непакаранымі», – адзначыла фон дэр Ляен.
Нагадаем, што Генасамблея ААН прыняла 14 лістапада рэзалюцыю аб рэпарацыях Украіне з боку Расеі. Рэзалюцыю падтрымалі 93 краіны, 13 краінаў прагаласавалі супраць.
Генасамблея «прызнае неабходнасць» стварэння ў супрацы з Украінай міжнароднага механізму для кампенсацыі шкоды і стратаў, а таксама «рэкамендуе» стварыць у супрацы з Украінай міжнародны рэестр для рэгістрацыі доказаў шкоды і стратаў усіх фізічных і юрыдычных асобаў, а таксама Украіны як дзяржавы.
Якуб Хруст belsat.eu
