«Чарговы тэрор». Шэсць чалавек загінулі ў выніку расейскага ракетнага ўдару па Харкаве
Позна ўвечары 21 кастрычніка расейскія ракеты ўдарылі па тэрмінале «Новай пошты» пад Харкавам. У выніку абстрэлу загінулі шэсць чалавек, 14 былі параненыя. Пра гэта паведаміў кіраўнік Харкаўскай абласной адміністрацыі Алег Сынегубаў.
Як удакладніў Алег Сынегубаў, удар быў нанесены з тэрыторыі Белгародскай вобласці як мінімум двума ракетамі С-300.
«Гэта выключна цывільны аб’ект, расейцы ўчынілі чарговы тэрор супраць мірнага насельніцтва Харкаўшчыны», – напісаў Алег Сінегубаў на сваёй старонцы ў «Facebook».
У выніку ракетнага ўдару па «Новай пошце» пад Харкавам загінула 6 чалавек, раненні рознай ступені цяжкасці атрымалі 14 чалавек. Усе яны цывільныя супрацоўнікі лагістычнага прадпрыемства. На месцы ўдару працуюць ратаўнікі, разбіраюцца завалы.
Прэзідэнт Украіны Уладзімір Зяленскі выказаў спачуванні сваякам загінулых і апублікаваў відэа з месца здарэння.
«Трэба ўзмацніць ціск на дзяржаву-тэрарыста. Нам трэба кожны дзень адказваць на расейскі тэрор сваімі ўдарамі на перадавой. Неабходна яшчэ больш умацоўваць адзінства свету ў барацьбе з тэрарызмам. І мы гэта робім.
Тэрорам і забойствамі Расея нічога не даможацца. Канец ва ўсіх тэрарыстаў адзін: адказнасць за ўчыненае», – напісаў Уладзімір Зяленскі.
Міністэрства ўнутраных справаў Украіны пазней удакладніла, што на момант удару на тэрыторыі пошты знаходзіліся 22 чалавекі – шэсць з іх загінулі, 16 атрымалі раненні і дастаўленыя ў лякарні. У міністэрстве таксама паведамілі, што каля знішчанага ўдарам будынку былі знойдзеныя рэшткі ракеты С-300.
Зміцер Міраш belsat.eu
