Расею чакае чарговая хваля мабілізацыі, што пагоршыць агульную якасць расейскіх войскаў, якіх перакідваюць на фронт ва Украіну. Пра гэта паведамляе Інстытут вывучэння вайны (ISW).
«18 лістапада ў расейскіх тэлеграм-каналах актыўна абмяркоўваліся прыкметы таго, што Крэмль рыхтуецца да другой хвалі мабілізацыі, і была распаўсюджаная выява прызыўной позвы, атрыманай жыхаром Санкт-Пецярбургу, якому, як паведамляецца, было загадана з’явіцца на мабілізацыю ў студзені 2023 года, нягледзячы на заяву прэзідэнта Расеі Уладзіміра Пуціна аб афіцыйным завяршэнні частковай мабілізацыі 31 кастрычніка», – паведамляе ISW.
Як паведамляюць у ISW, расейскія журналісты апублікавалі расследаванне, як дзяржаўныя структуры і прадпрыемствы працягваюць рыхтаваць сваіх работнікаў да мабілізацыі, адпраўляючы іх на розныя навучальныя праграмы і мабілізацыйныя навучальныя курсы.
Іншае расейскае выданне адзначала, што адзін з ваенных судоў Маскоўскай вобласці неспадзявана пацвердзіў, што мабілізацыя працягваецца. У прыватнасці, суд абвінаваціў мабілізаванага ў збіцці свайго камандзіра 13 лістапада «пры выкананні ім абавязкаў ваеннай службы або ў сувязі з выкананнем гэтых абавязкаў падчас мабілізацыі».
«Відавочна, што расейскія ўлады ніколі цалкам не спынялі мабілізацыйныя намаганні, а гэта азначае, што абмежаваная колькасць мабілізаваных навабранцаў усё яшчэ вымушана праходзіць сістэму навучання ў той жа час, калі прызыўнікі праходзяць уласны цыкл падрыхтоўкі», – адзначылі ў ISW.
На думку экспертаў, новая хваля мабілізацыі створыць дадатковую нагрузку на і без таго перагружаны расейскі апарат фармавання вайсковага рэзерву. Гэта прывядзе да яшчэ больш нізкай якасці па падрыхтоўцы як мабілізаваных прызыўнікоў, так і тэрміновай службы, паколькі яны будуць канкураваць за недастатковую колькасць «навучальных» месцаў.
Алена Рувіна belsat.eu
