Удава колішняга міністра замежных справаў, кіраўніца Тэатру юнага гледача Вера Палякова-Макей трапіла ў ДТЗ у Новасібірску разам з мастачкай па касцюмах Наталляй Лазарчык. Гэта здарылася, калі яны ехалі ў аэрапорт пасля гастроляў.
Мастачка па касцюмах ТЮГу Наталля Лазарчык апублікавала ў сторыс у сваім Instagram наступствы аварыі і паведаміла, што ў машыну, у ягой яна ехала разам з кіраўніцай тэатру Верай Паляковай-Макей, «урэзаўся нейкі ідыёт»:
«Па дарозе ў аэрапорт мы з Верай Паляковай трапілі ў жудасную аварыю. У нас урэзаўся ідыёт, машыну з усяго дуру адкінула ў аўтобус. Аўта, на якім мы ехалі, рамонту не падлягае. З намі і кіроўцам усё ў парадку».
Лазарчык таксама напісала, што ў момант здарэнне падумала пра гібель, а пасля адчула шчасце: «Якое цудоўнае жыццё, як хочацца жыць! Які літасцівы бог».
Лазарчык і Палякова-Макей трапілі ў ДТЗ 16 снежня па дарозе ў аэрапорт, калі яны вярталіся ў Беларусь з Новасібірску. Там беларускі Тэатр юнага гледача паказваў свой спектакль «Майстар і Маргарыта».
Вера Палякова-Макей узначаліла ТЮГ у леташнім красавіку і ўхваліла двухмоўе ў тэатры.
«У нашай краіне дзве дзяржаўныя мовы – расейская і беларуская. І ўпірацца толькі ў беларускую мову – губляць частку гледачоў, напрыклад, гасцей гораду. Я лічу, што спектаклі мусяць быць на дзвюх мовах», – казала яна.
Неўзабаве ў рэпертуары тэатру з’явіўся спектакль на расейскай мове «Альпы. Сорак першы» паводле «Альпійскай балады» Васіля Быкава.
Сцяпан Кубік belsat.eu