Качанава не адзначылася выказваннямі ды ідэямі, але ў 2020 годзе праваліла дзве кампаніі
Паводле абноўленай летась Канстытуцыі Беларусі менавіта кіраўнік Савету Рэспублікі ёсць асобай, якая ў выніку нейкага здарэння заменіць Лукашэнку. З 6 снежня 2019 года гэтую пасаду займае Наталля Качанава. «Белсат» сабраў некаторыя факты пра гэтую чыноўніцу.
Наталля Качанава нарадзілася ў 1960 годзе ў Полацку. Працоўны шлях пачынала ў мясцовым ЖКГ. Спачатку была аператарам пульта кіравання, інжынерам тэхнікі бяспекі, інжынерам вытворча-тэхнічнага аддзелу полацкага «Водаканалу». У пачатку 2000-х перайшла працаваць у мясцовы гарвыканкам, дзе таксама адказвала за сферу ЖКГ. З 2007 да 2014 год была старшынёю Наваполацкага гарадскога выканаўчага камітэту. У 2014-м Лукашэнка прызначыў яе віцэ-прэмʼерам. Пасля гэтага карʼера Наталлі Качанавай пайшла ўгару. Яна была кіраўніцай адміністрацыі Лукашэнкі, спікерам верхняй палаты парламенту. А згодна з абноўленаю летась Канстытуцыяй Беларусі, менавіта кіраўнік Савету Рэспублікі ёсць асобай, якая ў выніку нейкага здарэння заменіць Лукашэнку.
Трапіла ва ўладу паводле рэкамендацыі сілавікоў
Падчас апошняй прэсавай канферэнцыі Аляксандр Лукашэнка заявіў, што Качанаву рэкамендавалі сілавікі:
«Нават цяжка сказаць, што Качанава панюхала і паспрабавала, яна ж ішла па ЖКГ. Яна натуральным чынам прыйшла на гэтую пасаду, сумленна працуючы на сваіх пасадах. Прапанова прызначыць Качанаву зыходзіла ад сілавых структураў. Я папрасіў Андрэйчанку пісьмова паручыцца. Ён адклікнуўся станоўча».
Прыхільніца Лукашэнкі і Пуціна
З моманту пераходу на працу ў Менск Наталля Качанава стварае ўражанне адданай Аляксандру Лукашэнку. Падчас аднаго з інтэрвʼю яна заявіла, што беларусам і расейцам неймаверна пашанцавала з кіраўнікамі: маўляў, Аляксандр Лукашэнка і Уладзімір Пуцін – выключныя палітыкі, якія прысвячаюць сябе служэнню дзяржаўным інтарэсам.
«У сваю чаргу наш абавязак і маральны доўг як адказных асобаў, грамадскіх дзеячаў і шараговых грамадзянаў – не падвесці беларускага і расейскага лідараў», – сказала Качанава.
Генератар банальных выказванняў
З пачатку сваёй палітычнай карʼеры Наталля Качанава не агучыла ніводнага яскравага выказвання, не здолела згенераваць ніводнай свежай ідэі. У медыях яе называюць «генератарам банальных выказванняў».
Былы галоўны рэдактар «Советской Белоруссии» Павел Якубовіч у размове з «Нашаю Ніваю» заявіў, што ў наборы Наталлі Качанавай усяго толькі каля дзесяці выразаў, кшталту «трэба быць бліжэй да людзей», «людзі – гэта галоўнае».
Правалы з вызначанымі заданнямі
У 2020 годзе Лукашэнка даручыў Качанавай узначаліць кампанію барацьбы з каронавірусам, таксама менавіта яна адказвала за прэзідэнцкую кампанію. Гэтыя дзве задачы Качанава з трэскам праваліла.
З моманту пачатку пандэміі каронавіруса ў Беларусі ўлады адмаўлялі наяўнасць праблемы. Не было ніякіх каранцінных абмежаванняў, якія ўвялі ўсе без выключэння суседнія краіны. У выніку смяротнасць ад каронавіруса ў Беларусі была адною з самых высокіх у свеце. Грамадства не паверыла ўладам, Лукашэнку, што значна паўплывала і на прэзідэнцкія выбары.
Што да самой кампаніі, то, паводле медыяў, менавіта Наталля Качанава настойвала на тым, каб ЦВК агучыла, што Лукашэнка перамог у выбарах 2020 года з 80 % галасоў выбарнікаў. У гэты ж час Віктар Шэйман нібыта прапаноўваў агучыць, што за Лукашэнку прагаласавалі 60 % беларусаў. Але меркаванне Качанавай з усімі наступствамі перамагло.
Таксама паведамлялася, што менавіта Качанава аддавала загад сілавікам на поўнае ўжыванне сілы і жорсткіх катаванняў у дачыненні беларусаў, якія выйшлі на мірны пратэст у 2020-м.
Усурʼёз распавядала пра «план Далеса»
У снежні 2020 года Наталля Качанава сустракалася з студэнтамі журфаку БДУ. На гэтай сустрэчы чыноўніца распавядала студэнтам «план Далеса» і нават паказала дакументальны фільм.
Насамрэч гэты «план» – папулярная ў час халоднай вайны ў СССР тэорыя змовы. Пацверджанняў існавання такога дакументу проста не існуе.
Трапіла пад санкцыі ЗША, Канады, ЕЗ
У снежні 2020 года Наталлю Качанаву залучылі ў чорны спіс 27 краінаў ЕЗ. Галоўнаю прычынаю для абмежаванняў стаўся ейны ўдзел у фальсіфікацыях выбараў 2020 года. Пазней у дачыненні яе санкцыі ўвялі Вялікая Брытанія, ЗША, Канада, Швейцарыя, Японія і Украіна.
Мікалай Каткоў belsat.eu
