Стан здароўя Аляксандра Лукашэнкі на парадзе 9 траўня ў Маскве выклікаў у гледачоў вялікія пытанні. Але беларускія тэлеграм-каналы пісалі пра ягоную хваробу яшчэ на мінулым тыдні. Цяпер іх словы пацвердзілі кадры са сталіцы РФ.
Раніцай 9 траўня Аляксандр Лукашэнка ўзяў удзел у парадзе ў Маскве. Аднак пасля заканчэння параду, калі ўсе госці мелі прайсці пешшу каля 300 метраў для ўскладання кветак да магілы Невядомага салдата побач з Крамлём, Лукашэнка вырашыў ехаць да месца на электрамабілі. Таксама падчас параду на правай Лукашэнкавай руцэ заўважылі бінт. А на абедзе кіраўнікоў краінаў СНД, які сабраў Пуцін пасля параду, ён ужо не прысутнічаў. У Менск Лукашэнка вярнуўся а 12:40.
Пра новае захворванне Лукашэнкі тэлеграм-каналы паведамлялі яшчэ на мінулым тыдні. Гэтак, яшчэ 5 траўня «Хартыя 97» звярнула ўвагу на тое, што ён «ахрып і ледзь размаўляе». Менавіта такое відэа прадставілі рэжымныя медыі.
Таксама і тэлеграм-канал «Беларуская выведка» паведамляў, што проста з нарады 2 траўня Лукашэнка паехаў дадому.
«Ва ўсіх ягоных блізкіх, якія жывуць з ім, дыягнаставалі сумесь COVID і грыпу. Тры дні ён правёў у ложку і не пакідаў рэзідэнцыі. Прэс-службе давялося падбіраць «левыя фота» з хакейных мерапрыемстваў, – пісалі аўтары каналу і дадавалі: – Удзел у далейшых мерапрыемствах пад пытаннем».
Таксама і «Ник и Майк» ужо 8 траўня паведамлялі, што Лукашэнку «актыўна вярталі да прытомнасці і тэставалі ў больніцы Кіраўніцтва справамі ў выходныя».
І вось цяпер, пасля візіту ў Маскву, ужо расейскі BRIEF піша пра сур’ёзную хваробу Лукашэнкі:
«Аднак на асабістую просьбу Пуціна Лукашэнка прыехаў у Маскву. Крыніца паведамляе, што Лукашэнку далі брыгаду дактароў. «Ён адмяніў усе сустрэчы, застаецца пад кропельніцай».
З афіцыйных сустрэчаў Лукашэнку ў аэрапорт суправаджала карэта хуткай дапамогі, паведамляў ужо палітолаг Дзмітрый Балкунец.
Увечары 9 траўня ў Лукашэнкі запланаванае ўскладанне кветак у Менску.
Макар Мыш belsat.eu