На маляўнічым гарадзішчы з 950-годняй гісторыяй побач з вялізарным возерам Дрывяты з’яўляюцца людзі ў скураным адзенні і са зброяй вікінгаў. Фэст «Меч Брачыслава» пераносіць гледача і ўдзельнікаў на цэлыя стагоддзі ў мінулае.
Сучасны беларус ці замежны госць нібыта ператвараецца ў сведку таго, як сваякі мужнага і ўладарнага заснавальніка Браслава, выдатнага прадстаўніка балцкага роду полацкіх князёў Брачыслава Ізяславіча з дружыны ваяроў толькі што прыплылі па возеру і падняліся на вал Браслаўскага гарадзішча.
Аматары культуры ранняга сярэднявечча, якія з’язджаюцца на фэст штогод з Беларусі, Латвіі і Польшчы, імкнуцца як мага больш дакладна рэканструяваць і ажывіць побыт культуры Браслаўшчыны. Рэканструктары ствараюць лагер, у якім адпачываюць у шатрах і намётах на сене і скурах, гатуюць ежу на вогнішчы ў рэпліках тагачаснага посуду.
Фэст «Меч Брачыслава» і на гэты раз пачаўся з добрай традыцыі, паводле якой кіраўнікі гістарычных клубаў найперш агульнымі сіламі здабылі агонь, а потым разнеслі яго і запалілі вогнішчы каля сваіх намётаў.
Не менш відовішчным было і святочнае касцюміраванае шэсце па вале Браслаўскага гарадзішча на фоне бяскрайняга блакітнага возера Дрывяты, але зразумела, што больш за ўсё гледачы чакалі рыцарскіх бітваў.
У адрозненне ад рыцараў Позняга Сярэднявечча ваяры Ранняга Сярэднявечча былі значна менш экіпіраваныя і абароненыя, таму і бітвы паміж імі больш хуткія але і небяспечныя для іх удзельнікаў.
Гэтым разам ваяры падарылі гледачам яскравае відовішча, але і не абышлося без траўмаў аж да хуткай дапамогі і больніцы.
АС, belsat.eu