З’явіўся на публіцы, калі яшчэ не дацягваўся да выбарчай скрыні… А ўжо гэтым летам упершыню выступіў самастойна.
Малодшаму сыну Аляксандра Лукашэнкі Мікалаю сёння спаўняецца 11 гадоў, з якіх 7 – не сціхае дыскусія пра ягоны статус.
АЛЕСЬ ЛАГВІНЕЦ, ПАЛІТОЛАГ:
«Па тым, як пазіцыянуецца ў сродках масавай інфармацыі асоба Мікалая Лукашэнкі, выглядае сапраўды, што яму адводзіцца роля гэтак званага «наследнага прынца».
Неафіцыйны «прынц-спадкаемец» рэгулярна бярэ ўдзел у спатканнях з кіраўнікамі іншых дзяржаваў, замежных візітах, гуляе ў хакей, а сёлета нават прымаў парад у пагонах галоўнакамандуючага. Адным словам, робіць усё тое, што і ягоны бацька.
ЮРЫЙ ХАШЧАВАЦКІ, РЭЖЫСЁР:
«У гэтым сэнсе Аляксандр Рыгоравіч не ёсць арыгінальным. Як у вёсцы – хата застаецца сыну ад бацькі, гэтак і «Бацька» хоча перадаць той дом, які ён лічыць сваім, то бок Беларусь».
Згодна з ацэнкаю аўтара стужкі «Звычайны прэзідэнт», цяпер Лукашэнка актыўна рыхтуе грамадства прыняць ягонага пераемніка.
Падобнае меркаванне раней выказваў і экс-прэзідэнт Савецкага Саюзу Міхаіл Гарбачоў, якога паводзіны Лукашэнкі моцна абурылі.
МІХАІЛ ГАРБАЧОЎ, ЭКС-ПРЭЗІДЭНТ СССР:
«Узяў за рукі Колю і рыхтуе сабе змену. І не хавае гэтага, быццам бы ў нас там Каралеўства Беларусь».
Пытанне пра пераемнасць улады ў Беларусі – адно з самых частых і з боку замежных медыяў. Хоць кіраўнік Беларусі ў сваю чаргу нязменна адмаўляе такую магчымасць.
АЛЯКСАНДР ЛУКАШЭНКА, КІРАЎНІК БЕЛАРУСІ:
«Улада пасля Лукашэнкі ў нас будзе ў таго, хто яе выграе на выбарах».
Пасля якога з Лукашэнкаў – не ўдакладняецца. Зрэшты, да таго, што малодшы калісьці возьме ўдзел у выбарах, ужо падрыхтаваная частка электарату.
ЖЫХАРЫ БАБРУЙСКУ:
«Няхай вучыцца, набіраецца досведу. Можа, добры кіраўнік будзе».«Калі ён здольны, калі ў яго ёсць упэўненасць».
«Нармальна, у прынцыпе. Бацька яго навучыць».
І перадасць уладу, як калісьці бацька сірыйскага дыктатара Башара аль-Асада, ці, напрыклад, лідара Паўночнай Карэі Кім Чэн Ына. Стан краінаў, якімі кіруюць гэтыя пераемнікі, можна, бадай, пакінуць без каментара.
Вольга Жарнасек, «Белсат»
