Дэпутаты канчаткова падтрымалі пенсійную рэформу. Але гэта яшчэ не канец

Трэцяе і фінальнае слуханне ў Дзярждуме РФ скончылася прыняццем пенсійнай рэформы. За выказаліся 332 дэпутаты, супраць – 83, тых, хто ўстрымаліся, не было.

Камуністы, «Справядлівая Расея» і ЛДПР выступілі супраць павышэння пенсійнага ўзросту.

«Мы не лічым гэта рэформай. Яна падрывае нацыянальны суверэнітэт. Я вельмі здзіўлены тым, што вы не бачыце, што 80% грамадзянаў катэгарычна супраць гэтага закону – іх выступы становяцца больш радыкальнымі. Я б на месцы прэзідэнта не стаў падпісваць гэты закон. Ён атрымаў 77%, а 80% грамадзянаў супраць!», – заявіў лідар КПРФ Генадзь Зюганаў.

Праўладная «Адзіная Расея» цалкам падтрымала законапраект.

«Праз некалькі гадоў пенсія б ператварылася ў маленькую, плоскую дапамогу, якую атрымлівала б палова непрацаздольнага насельніцтва. Нашае нічоганерабленне асудзіла б людзей на татальную галечу», – цытуе дэпутата-адзінароса Андрэя Ісаева «Новая газета».

Каля будынка Дзярждумы прайшоў чарговы пікет супраць пенсійнай рэформы.