Старшыня Праваабарончага цэнтру «Вясна» Алесь Бяляцкі, які прысутнічаў на судовым паседжанні Андрэя Бандарэнкі, выказаў сваю ацэнку судоваму рашэнню.
Паводле праваабаронцы, «Вясна» задаволеная апраўдальным прысудам, хоць і зразумела, што рашэнне па справе Андрэя Бандарэнкі прымалася не суддзём, а вышэйшымі інстанцыямі.
Раней праваабаронцы «Вясны» заяўлялі, што ў выпадку асуджэння Андрэя Бандарэнкі па артыкуле 411 Крымінальнага кодэкса Рэспублікі Беларусь, яго прызнаюць палітычным зняволеным.
«Падаецца што ў апошні момант, дзеля тактычных меркаванняў, улады вырашылі не абвастраць сітуацыю і адмянілі загадзя падрыхтаваны прысуд. Тым не менш, мы працягваем настойліва крытыкаваць наяўнасць у Крымінальным кодэксе 411 артыкула, які дазваляе суб’ектыўна і селектыўна, па волі і жаданні адміністрацыі пенітэнцыярнай сістэмы, ці тых хто за ёй стаіць, караць «злосных парушальнікаў рэжыму» дадатковым турэмным тэрмінам.
Тое што Андрэй Бандарэнка неўзабаве апынецца на волі – з’яўляецца заслугай як беларускіх праваабаронцаў, так і ўсёй неабыякавай беларускай грамадскасці. Мы будзем дабівацца скасавання 411 артыкула з Крымінальнага кодэксу як ганебнага рудымента савецкіх часоў», – сказаў праваабаронца.
30 сакавіка Андрэя Бандарэнку, былога кіраўніка праваабарончай арганізацыі «Платформ Інавэйшн» апраўдалі за адсутнасцю склада злачынства. Яго вызваляць з Магілёўскай турмы №4, дзе ён адбываў пакаранне, 31 сакавіка.
ДР belsat.eu паводле spring96.org