НФК «Крумкачы» падпісаў пагадненне аб супрацы з Нацыянальным аэрапортам «Менск».
Дамова заключаная да канца бягучага сезону, аднак бакі могуць працягнуць партнёрства і ў наступным годзе, паведамляе сайт сталічнага футбольнага клубу.
Можна меркаваць, што гэта залежыць ад поспехаў клубу, які цяпер выступае ў трэцім дывізіёне.
Пакуль «Крумкачы» займаюць чацвёртае месца і змагаюцца за выхад у Першую лігу. Лагатып новага партнёра размесцяць на саколках футбалістаў над гульнявымі нумарамі.
«Слоган нашага аэрапорту – «Самы кароткі шлях да мары!» – падобны на гісторыю гэтай футбольнай каманды. Хлопцы ў свой час паказалі, што няма нічога немагчымага і можна выгуляць любога суперніка, а цяпер зноў штурмуюць вышыні беларускага футболу. Мы цэнім гэтае жаданне і імкненне да перамогаў!» – заявіў намеснік гендырэктара Нацыянальнага аэрапорту «Менск» Віктар Палей.
Сузаснавальнік сталічнага клубу, лаўрэат міжнародных конкурсаў піяніст Юрый Бліноў так пракаментаваў супрацу:
«Мы цешымся, што ў нас з’явіўся такі партнёр, як самы галоўны аэрапорт краіны. Цяпер будзем «Ляцець высока і глядзець далёка» разам!»
НМ, belsat.eu, фотаздымак Юлія Рыпінская/ Суполка ў ВК «Крумкачоў»
