Сталічная моладзь, што ўлетку адпрацавала ў студатрадах, не гарыць жаданнем замацаваць досвед. Гэткія папярэднія вынікі апытання з’явіліся на сайце Менскага навукова-даследчага інстытуту сацыяльна-эканамічных праблемаў. Служба інфармацыі “Белсату” дзеліцца несуцяшальнымі вынікамі.
Студэнты больш не хочуць атрадаў
Трэба адзначыць, што прапанаваныя звесткі – не канчатковыя. Ананімнае віртуальнае апытанне пачалося 3 верасня і скончыцца 31 кастрычніка. Таму грамадская думка яшчэ мае час павярнуцца ў адваротным кірунку. Тым не менш, на фоне дзяржаўнай прапаганды БРСМаўскіх студэнцкіх атрадаў, на фоне стварэння іх пазітыўнага іміджу, нават папярэднія вынікі заслугоўваюць увагі.
Адкуль прыйшлі ў студатрад
Большасць рэспандэнтаў трапіла на працу ў студэнцкія атрады дзякуючы рэкламе ў медыях, абвесткам у навучальных установах, а таксама праз БРСМ. 15 % сказалі, што працавалі раней ды захацелі трапіць у студатрад ізноў. Яшчэ столькі ж паслухаліся парады знаёмых.
Большасць (43 %) маладых людзей кажа, што падтрымала БРСМаўскую ініцыятыву, бо хацела зарабіць грошай. Яшчэ 30 % рамантычна заяўляюць, што імкнуліся пабачыць новыя мясціны, знайсці новыя знаёмствы ды проста адпачыць, змяніўшы від дзейнасці.
Якія ўражанні?
У медыях рэкламаваліся будаўнічыя і сельскагаспадарчыя студатрады. 15 % рэспандэнтаў рабілі на будоўлях. Астатнія былі на экалагічных і сервісных працах (па 15 %). Пераважная частка (58 %) выконвала абавязкі невядомага характару – “іншага профілю”.
Апытанне ўдзельнікаў студатрадаў
Ступень задавальнення ад працы ў студатрадзе у моладзі невысокая. Гэтак, 43 % рэспандэнтаў далі адказ “шчыра кажучы, магло б быць і лепей”, 30 % яшчэ не вызначыліся. Адказ “нармальна, без праблемаў” і “агулам усё было добра” далі па 15 % апытаных. Ніхто пакуль не адказаў “прыўкрасна, застаўся задаволены”.
Ці паедзеце яшчэ
У 70 % рэспандэнтаў няма ў планах налета вярнуцца на працу ў студатрады. Амаль 30 % пакуль не гатовыя адказаць і абяцаюць “яшчэ падумаць”.
belsat.eu
