Пісьменнік і гісторык Уладзімір Арлоў: “Дарагія браты! Кагосьці з вас я даўно і добра ведаю, з некім незнаёмы, але ўсім вам сардэчна зычу як мага хутчэй вярнуцца да родных і сяброў, да чыстага незакратаванага неба і яснага сонца. Ёсць такі афарызм: той, хто найбольш прагне свабоды, часта мусіць чакаяць яе не ў самых камфартабельных памяшканнях. Я зычу вам не толькі не губляць ніколі мужнасці, але і пачуцця гумару. Мы верым, што хутка ўсіх вас убачым не толькі не зломленымі, але і здаровымі”.
Ганс-Герт Пётэрынг, нядаўні старшыня Еўрапарламенту: «Прыйдзе дзень, калі Беларусь таксама будзе жыць у свабодзе. Я хачу выказаць сваю шчырую салідарнасць з усімі зняволенымі, якія сядзяць у турме з палітычных матываў. Усе палітвязні Беларусі – гэта адважныя мужчыны і жанчыны. І мы ў Еўразвязе мусім выказаць нашую салідарнасць з імі».
У межах адмысловай акцыі тэлебачання “Белсат” больш за трыццаць вядомых асобаў Беларусі ды свету выступяць з пасланнямі да беларускіх палітычных зняволеных.
Кароткія ролікі будуць ісці штодня пасля галоўнага выдання “Аб’ектыву” а 21.25, а таксама пасля паўтораў галоўнага выдання інфармацыйнай праграмы “Белсату” напрыканцы трансляцыі ды раніцаю а 7.20. Кліпы таксама будуць размешчаныя на сайце тэлеканалу www.belsat.eu.
Гледачы і прыхільнікі “Белсату” могуць далучыцца да акцыі ды даслаць свае ролікі са словамі падтрымання беларускіх палітвязняў на адрас salidarnasc@belsat.eu. Ліст мае ўтрымліваць вашую пісьмовую згоду на бязвыплатнае змяшчэнне відэазвароту на старонцы www.belsat.eu, а таксама ў эфіры тэлеканалу.
belsat.eu
