Пяты пакет санкцыяў ЕЗ на падыходзе, новыя палітвязні. Галоўнае за 30 лістапада
477 дзён працягваецца палітычны крызіс у Беларусі. Грамадства патрабуе новых выбараў, адстаўкі Лукашэнкі, пакаранне вінаватых у фальсіфікацыях і гвалце. Улады ў сваю чаргу працягваюць тэрор супраць грамадзянаў краіны. Як мінуў дзень – у аглядзе «Белсату».
1 снежня прымуць пяты пакет санкцыяў
Пяты пакет санкцыяў Еўразвязу супраць уладаў Беларусі ўхваляць 1 снежня, абмежаванні пачнуць дзейнічаць з дня публікацыі, паведамляе радыё «Свабода». У санкцыйны спіс уключылі 17 чыноўнікаў і 11 арганізацыяў.
Ірыну Слаўнікаву прызналі палітзняволенай
Беларускія праваабарончыя арганізацыі прызналі Ірыну Слаўнікаву палітзняволенай і патрабуюць яе вызвалення.
Блогерку Вольгу Такарчук будуць судзіць
Матэрыялы крымінальнай справы палітзняволенай маці дваіх дзяцей Вольгі Такарчук перададзеныя ў пракуратуру для далейшага накіравання ў суд.
Лукашэнка прызнаў Крым расейскім і распавёў пра ядравую зброю
У інтэрв’ю Дзмітрыю Кісялёву Аляксандр Лукашэнка на пытанне пра магчымае размяшчэнне ў Польшчы ядравай зброі заявіў, што ў адказ папросіць Пуціна таксама вярнуць у Беларусь ядравую зброю, піша БелТА.
Таксама Аляксандр Лукашэнка заявіў, што Крым пасля рэферэндуму зʼяўляецца расейскім дэ-факта і дэ-юрэ, піша прэсавая служба Лукашэнкі.
У Чэхіі затрымалі кіраўніка беларускага футболу
Мараўска-Сілезская паліцыя Чэхіі затрымала старшыню Беларускай асацыяцыі футболу Уладзіміра Базанава, паведамляе выданне denikn.cz. Беларускага чыноўніка дэпартуюць з краіны.
Кіберпартызанаў прызналі тэрарыстычнай арганізацыяй
Вярхоўны Суд прызнаў тэрарыстычнай нефармальную арганізацыю «Супраціў» і ініцыятывы «Кибер-Партизаны», «Дружины Народной Самообороны – ДНС», «Буслы ляцяць», паведамляе прэс-служба Генпракуратуры.
Польшча адмовілася выдаваць беларуса
У Польшчы суд пастанавіў не выдаваць Беларусі Макарыя Малахоўскага, экстрадыцыі якога патрабаваў афіцыйны Менск.
АЯ belsat.eu
