29 сакавіка а 15-й гадзіне памерла Лета Юстыновіч – 85-гадовая беларуска, якая ўдзельнічала амаль ва ўсіх вулічных апазіцыйных акцыях у Менску, паведамляе «Наша Ніва».
Лета Юстыновіч нарадзілася ў Менску ў 1939 годзе. Гадавалася без бацькі, бо ён, па прафесіі інжынер, загінуў 12 сакавіка 1940 года на савецка-фінскай вайне. Маці была настаўніцай.
Адукацыю Лета атрымлівала ў менскім Політэхнічным інстытуце. Пасля яго заканчэння паехала працаваць у сібірскі горад Брацк, але праз пяць гадоў вярнулася на радзіму.
Вядомай жанчына стала таму, што, як сама казала ў 2009 годзе, «у 1989-м, калі пачалося Адраджэнне, я кінулася ў яго з галавой. Гэтыя дваццаць гадоў ім і жыву».
Спадарыню Лету можна было бачыць практычна на ўсіх апазіцыйных акцыях, якія адбываліся ў Менску – і на буйных, і на дробных, часта – разам з Нінай Багінскай. Лета Юстыновіч стала сапраўдным сімвалам і ўвасабленнем беларускага нацыянальнага і дэмакратычнага руху.
Марыя Міхалевіч belsat.eu
