Урад Расеі ўнёс у Дзярждуму законапраект, згодна з якім з 1 ліпеня 2024 года прадаўцы з ЕАЭС, якія прадаюць свае тавары расейцам праз электронныя гандлёвыя пляцоўкі, павінны будуць выплачваць ПДВ у расейскі бюджэт.
Пакуль прадаўцы, якія плацяць падаткі ў ЕАЭС і рэалізоўваюць тавар расейскім фізічным асобам праз электронныя гандлёвыя пляцоўкі, не павінны выплачваць ПДВ у Расеі. Удакладняецца, што электронная гандлёвая пляцоўка – гэта сайт, дзе можна замовіць тавар, даведацца ўмовы аплаты і дастаўкі.
Памер асноўнай стаўкі ПДВ у Расеі складае 20 % ад кошту тавару, а льготнай – 10 %.
Такім чынам Расея хоча стварыць больш выгадныя ўмовы для свайго гандлю.
«Прыняцце праекту федэральнага закону дазволіць удасканаліць сістэму адміністравання ПДВ, ліквідаваць няроўнасць у падаткаабкладанні ПДВ расейскіх і замежных падаткаплатнікаў і, адпаведна, створыць больш спрыяльныя ўмовы для рэалізацыі расейскімі падаткаплатнікамі тавараў фізічным асобам на тэрыторыі дзяржаваў – чальцоў ЕАЭС», – адзначаецца ў тлумачальным паданні.
Калі закон прымуць, ён набудзе моц праз месяц пасля афіцыйнага апублікавання. Мяркуецца, што на індывідуальных прадпрымальнікаў з ЕАЭС ён будзе распаўсюджвацца з 1 студзеня 2025 года. Выключэнне – ІП, якія працуюць праз пасярэднікаў на падставе дамоваў камісіі. У такім выпадку падатак павінен будзе заплаціць пасярэднік.
Арсен Рудэнка belsat.eu
