Фінляндыя закрые ўсю мяжу з Расеяй з 30 лістапада да 13 снежня, каб спыніць плынь просьбітаў прытулку. На думку ўрада Фінляндыі, іх наплыў арганізаваны Крамлём, піша Reuters.
Фінляндыя ўжо закрыла сем памежных пунктаў на мяжы з Расеяй, пакінуўшы толькі адзін. Цяпер і ён будзе зачынены.
Па дадзеных фінскай памежнай службы, у лістападзе ў Фінляндыю з Расеі ўехала каля 900 просьбітаў прытулку з Кеніі, Марока, Пакістана, Самалі, Сірыі і Йемена.
Паміж дзвюма краінамі будуць праходзіць толькі грузавыя цягнікі.
Урад Фінляндыі сцвярджае, што Масква перапраўляе людзей на мяжу ў адплату за рашэнне пашырыць абаронную супрацу са Злучанымі Штатамі. У Маскве гэта адмаўляюць. Скандынаўская краіна далучылася да NATO у красавіку 2023 года. А колькасць просьбітаў прытулку рэзка павялічылася восенню.
«Гэта аперацыя ўплыву Расеі, і мы яе не прымаем», – заявіў на прэс-канферэнцыі прэм’ер-міністр Фінляндыі Петэры Орпа.
Прытулак па-ранейшаму могуць прасіць вандроўцы, якія прыбываюць на лодках і самалётах.
Раней высокапастаўленыя асобы Фінляндыі папярэджвалі, што гатовыя рэагаваць на паток мігрантаў, якія ідуць з боку Расеі.
Арсен Рудэнка belsat.eu