Кіраўнік расейскага МЗС Сяргей Лаўроў адклаў візіт у Менск у сувязі са смерцю кіраўніка МЗС Беларусі Уладзіміра Макея. Пра гэта паведамляе ТАСС са спасылкай на прэсавую службу расейскага міністэрства.
Паведамляецца, што працоўны візіт міністра замежных справаў РФ Сяргея Лаўрова ў Менск і правядзенне паседжання калегіяў МЗС Беларусі і Расеі, запланаваныя на 27–28 лістапада, адклалі ў сувязі са смерцю кіраўніка МЗС Беларусі Уладзіміра Макея.
«У сувязі з заўчаснай смерцю кіраўніка МЗС Рэспублікі Беларусь Уладзіміра Макея вырашана адкласці правядзенне паседжання калегіяў МЗС Беларусі і МЗС Расеі і працоўнага візіту міністра замежных справаў РФ Сяргея Лаўрова ў Менск, запланаванае на 27–28 лістапада», – адзначылі ў расейскім дыпведамстве.
У ведамстве дадалі, што «пра новыя тэрміны візіту і паседжанні калегіяў будзе дадаткова абвешчана».
Планавалася, што кіраўнік расейскага дыпведамства Сяргей Лаўроў наведае Менск 27–28 лістапада для ўдзелу ў супольным паседжанні калегіі МЗС РФ і Беларусі. Як інфармаваў ТАСС, меркавалася сустрэча з Аляксандрам Лукашэнкам.
Раней у суботу МЗС Беларусі паведаміла пра раптоўную смерць кіраўніка дыпламатычнага ведамства. Лаўроў накіраваў жонцы калегі тэлеграму са спачуваннямі ягоным блізкім і родным.
Раней дзяржаўнае інфармацыйнае прадпрыемства «БелТА» паведаміла 26 лістапада пра смерць міністра замежных справаў Беларусі Уладзіміра Макея. Гэта пацвердзіла Міністэрства замежных справаў. Яшчэ 25 лістапада Макей сустракаўся з апостальскім нунцыем (амбасадарам Ватыкану) Антэ Ёзычам. 23 лістапада Макей лётаў у Ерэван на саміт Арганізацыі дамовы калектыўнай бяспекі.
Антон Тачняк belsat.eu