Вярхоўны Суд вынес рашэнне ў разборы паміж інтэрнэт-крамай «Еўраопт» і Міністэрствам антыманапольнага рэгулявання і гандлю. «Еўраопту» адмовілі ў задавальненні пазову, паведамляе МАРГ.
Справа датычыла рэкламнага роліку «Е-дастаўкі», які быў паказаны на тэлеканале ОНТ у траўні 2021 года. Таксама відэа размясцілі ў YouTube. У роліку параўноўваліся кошты «Е-дастаўкі» ды іншых крамаў. Напрыклад, у рэкламе гаварылася, што кошты «Е-дастаўкі» «ў сярэднім на 30 % ніжэйшыя, чым у канкурэнтаў», «за падгузнікі ў іншых крамах можна пераплаціць да 46 % у параўнанні з «Е-дастаўкай», што корм для хатняй жывёлы ў інтэрнэт-краме таннейшы на 42 %, а таксама, што «Е-дастаўку» выбіраюць усе».
У выніку МАРТ палічыў такую рэкламу нядобрасумленнай канкурэнцыяй. У ведамстве прыйшлі да высновы, што «не ўяўляецца магчымым аб’ектыўна праверыць» сцвярджэнні інтэрнэт-крамы аб яе перавагах, прыведзеных у рэкламе. Таму камісія ведамства аштрафавала юрыдычную асобу на суму, эквівалентную 10 % яе гадавой выручкі. Гэтая сума можа быць ад 32 да 45 млн рублёў у залежнасці ад года, пазначанага ў дакументах.
Інтэрнэт-крама «Еўраопт» не пагадзілася з абвінавачаннямі і звярнулася ў Вярхоўны Суд. Аднак суд стаў на бок МАРГ.
Пасля рашэння на сайце «Е-дастаўкі» з’явіўся банэр з абвяржэннем інфармацыі, указанай у рэкламным роліку.
Алена Рувіна belsat.eu
