Крысціна Ціманоўская прабегла дыстанцыю 200 метраў з вынікам 23,34 і страціла прытомнасць
У паўфінале чэмпіянату свету па лёгкай атлетыцы ў Будапэшце беларуская бягуння Крысціна Ціманоўская, якая цяпер выступае за Польшчу, прыбегла 8-й і не трапіла ў фінал. Вынік спартоўкі пры гэтым досыць сімвалічны – 23,34 секунды.
«Гэта спорт. На жаль, я страціла прытомнасць пасля фінішу і нічога не памятаю, – напісала Крысціна на сваёй старонцы ў Instagram. – Пасля 150 метраў усё было як у тумане».
Раней Ціманоўская бегла дыстанцыю 100 метраў і таксама не трапіла ў фінал.
Ціманоўская яшчэ будзе бегчы эстафету 4 па 100 метраў.
Чэмпіянат свету па лёгкай атлетыцы ў Будапэшце скончыцца ў гэтую нядзелю, 27 жніўня.
У 2021 годзе Крысціна Ціманоўская брала ўдзел у Алімпійскіх гульнях у Токіа ў складзе беларускай нацыянальнай зборнай. Калі спартоўка адмовілася бегчы не сваю дыстанцыю, а яшчэ і распавяла пра гэта ў сацыяльных сетках, раскрытыкаваўшы беларускіх спартовых чыноўнікаў, яе паспрабавалі сілаю вярнуць у Беларусь. Аднак бягуння звярнулася ў мясцовую паліцыю ды медыі і заявіла, што баіцца вяртацца ў Беларусь праз пагрозу рэпрэсіяў. Пасля гэтага Крысціна паехала ў Польшчу, дзе атрымала гуманітарны від на жыхарства, а пазней і грамадзянства. Польскі пашпарт Ціманоўская атрымала 28 чэрвеня 2022 года паводле асаблівага ўказу прэзідэнта Анджэя Дуды.
Марыя Міхалевіч belsat.eu
