«Белсату» стала вядома пра затрыманне працаўнікоў Музею традыцыйнай культуры ў Браславе. У дамах быў учынены ператрус. Затрымалі дырэктарку ўстановы.
Затрыманне адбылося ўначы напярэдадні выставы «Калядныя ўзоры», якая адкрылася ў музеі 22 снежня.
Паводле нашай інфармацыі, уначы ў чацвер у дамы работнікаў Музею традыцыйнай культуры прыйшоў АМАП. Сярод затрыманых – загадчыца музею Элеанора Зінкевіч, ейны муж, а таксама іншыя працаўнікі ўстановы.
У дамах усіх работнікаў быў учынены «дасканалы ператрус», падчас якога знайшлі кнігі па гісторыі Беларусі, а таксама сканфіскавалі стары дакумент з пячаткаю, на якой выяўленая Пагоня.
Некаторых працаўнікоў ужо адпусцілі, некаторыя, разам з дырэктаркаю, застаюцца ў міліцыі.
Прычынаў затрымання не паведамляюць.
У праграме выставы «Калядныя ўзоры» значылася батлейка «Цар Ірад», майстар-класы, выстава вінтажных навагодніх цацак. Паведамляюць, што на выставу прыйшло шмат людзей, таму яе пастанавілі не адмяняць, нягледзячы на тое, што работнікаў музею не было на месцы.
Раман Шавель belsat.eu
